Kritiserer klimaforsker for kritikk mot olje-Ola

Klimaforskar Helge Drange ved Bjerknessenteret langa ut mot den ferske olje- og energiministeren i Aftenbladet laurdag. Han meiner Borten Moe manglar faktakunnskap om norske utslepp og klimaproblema. Nå rykker statssekretær Kjetil Lund (Ap) ut til Sp-statsråden sitt forsvar.

- Helge Drange og andre tar for lett på at det ville vera bra for verdas klima om Norge slutta å produsera olje og gass. For det er på ingen måte opplagt, seier Kjetil Lund, som leier FN-arbeidet med eit internasjonalt, grønt klimafond.

Treng brei samhandling

- 80 prosent av verda sin energibruk er frå kull, olje og gass. Den einaste måten å dressera klimaproblemet på, er å få til brei samhandling Det nyttar ikkje for enkeltland aleine å slutta å utvinna fossile brensel, meiner Kjetil Lund.

I front i klimapolitikken

- Utviklingsland krev at industriland som er ansvarlege for klimaproblemet, går føre og viser veg?

- Ja, det er rett, og derfor fører me ein aktiv, framoverlent klimapolitikk. Problemet lar seg berre løysa når me handlar breitt internasjonalt. Men når enkelte hevdar at om ikkje Norge går føre og reduserer petroleumsproduksjonen så vil me tapa truverde, så er dette eit argument som ikkje er brukt mot Norge i internasjonale klimaforhandlingar.

Oljeutvinning i nord?

- Lar auka oljeutvinning i nord seg kombinera med å løysa klimaproblemet?

- Det er ikkje tvil om at dersom me skal redusera utsleppa så mykje som det krevst for å nå togradersmålet, så må me redusera mykje. Over tid må den fossile energiproduksjonen stoppa eller skje på meir klimavenlege måtar, som med CO2-reinsing. Men om me lar vera å byggja ut i nord, betyr ikkje det at utsleppa ikkje vil komma. For kva blir den alternative krafta? Blir denne utsleppsfri, eller ei endå verre energiform som kol, spør Lund retorisk.

Diskutabel klimaeffekt

Han seier Norge kan velja å redusera petroleumsproduksjonen, men at det vil medføra problem både for norsk og internasjonal økonomi, og samtidig som klimaeffekten er diskutabel.

Lund understrekar at det ikkje er gitt at den beste måten Norge kan bidra på, er ved einsidig å redusera petroleumsindustrien. Dette vil gi liten og ingen klimaeffek, meiner han.

- Eg er stolt over petroleumsindustrien vår som er leiande på teknologi, også miljøteknologi. Norge har lenge ført ein aktiv klimapolitikk overfor olje- og gassindustrien som både har ført til klimakutt og teknologisk utvikling, legg han til.