AF Decom møter nytt millionkrav

Rauens Fiskefarm tapte så det song i Gulating Lagmannsrett i fjor og blei etterpå avvist i Høgsterett. Nå vil den vesle oppdrettsverksemda prøva saka for Agder lagmannsrett.

- Gulating lagmannsrett er ikkje blitt presentert for ein viktig del av faktagrunnlaget, seier styreleiar i Raunes Fiskefarm, Frode Bjelland. Han viser til at motparten, oljeopphoggingsbedrifta AF Decom, har nå fått høve til å kommentera Fiskefarmen sitt krav om ny rettssak. Deretter blir det opp til Agder lagmannsrett å ta stilling til om det skal opnast for nye rettsforhandlingar.

Faktagrunnlaget oversett

Raunes Fiskefarm vil ha prøvd på ny faktagrunnlaget og avtaleverket rundt naboskapet til opphoggingsbedrifta AF Decom.

- Raunes Fiskefarm var på plass i Vats med sitt anlegg for oppdrett av matfisk og klekking av torskeyngel før AF Decom ønskte det same industriarealet, seier Frode Bjelland. Han legg til at då Vindafjord kommune gjorde avtale med AF Decom om industritomt for hogging av oljeskrap, blei det lagt inn som ein føresetnad at Raunes Fiskefarm måtte flytta.

- Denne avtalen blei ikkje gjort kjent for Raunes Fiskefarm, seier Bjelland.

Han viser til at i lagmannsrettens dom blei det lagt til grunn at Raunes Fiskefarm flytta frivillig. - Dessutan flytta fiskefarmen berre eit kort stykke unna den nye store naboen AF Decom fordi dei ikkje blei informert om AF Decom sine omfattande vekstplanar for framtida, seier Frode Bjelland.

AF avviser

AF Decom sin direktør for Offshore verksemda, Bengt Hildisch, seier at AF avviser alle påstandar og krav frå Raunes Fiskefarm.

Hausten 2009 gjekk første runde av rettssaka i Karmsund tingrett i Haugesund. Der fekk Raunes Fiskefarm langt på veg medhald i sine krav. Dommen lydde på at AF skulle betala fiskefarmen nær 40 millionar kroner i erstatning. Men dommen blei anka til Gulating lagmannsrett der Fiskefarmen tapte og fekk berre ei erstatning på snautt seks millionar kroner.

Store tap

- Dette er er langt mindre enn kostnadene våre i samband med rettssaka, seier styreleiar Frode Bjelland. Han viser til at sakskostnadene som fiskefarmen ble dømt til å betala pluss eigne prosessutgifter er komne opp i ti millionar kroner.

- Det svir hardt for små bedrifter å gi seg i kast med lange og krevjande rettsprosessar, seier Bjelland, som legg til at Fiskefarmen dessutan fekk øydelagt ein heil årsproduksjon av torskeyngel på grunn av steinstøv frå AF Decom sine undervassprengingar.

- Steinstøvet kom inn i oppdrettskara gjennom sjøvassinntaket, seier Bjelland.

Etter driftstans i to år ved Raunes Fiskefarm er drifta komen i gong att. Dagleg leiar Sigmund Låte seier at ein nå har starta opp med produksjon av kveiteyngel i kar på land.

- Me vågar ikkje risken med å ha fisk i sjøen. Det blir for mykje gambling og fare for omdømmetap ettersom naboen vår, AF Decom stadig utvidar verksemda og varslar om auka utslepp til luft og sjø av mellom anna lågradioaktivt avfall, seier Låte.

Følg energiredaksjonen på Twitter.com/Aenergino