Aibel tvinges til utlandet

Det er viseadministrerande direktør i Aibel Erling Matland, som seier dette. Han viser til at dekket og utstyrsmodulane til Gudrun-feltet blir nå bygt med to av i alt tre delar ved Aibel sitt verft i Thailand. Samtidig blir ein tredel av Gudrun-dekket produsert ved Aibel sitt verft i Haugesund. Gudrun-plattforma skal samanstilllast, utprøvast og gjerast ferdig i Haugesund før utsleping til feltet i 2013.

Dermed kan ein stor og verdfull æra innan norsk verftsindustri vera over.

Tvinga utanlands

Matland viser til dei store endringane i konkurransesituasjonen for norske offshoreverft.

- Då Statoil avgjorde kven som skulle byggja Valemon-plattforma, ein installasjon som liknar på Gudrun, blei heile kontrakten gitt til eit koreansk verft. Neste gong må me leggja inn i tilbodet føresetnad om bygging utanlands. Ellers vil me ikkje kunne vinna oppdrag, seier Matland. Han legg til at også det meste av ingeniørarbeidet i samband med nybygg vil skje i utlandet i framtida.

- Aibel treng rask auke i talet på ingeniørar. Det kan på kort sikt skje gjennom samarbeid med utanlandske selskap. I Norge er marknaden for ingeniørar nærast støvsugd, seier viseadm. i Aibel som har rekruttert nær 1000 nye ingeniørar det siste året.

Opplæring i Asia

- Har de løyst utfordringane med å byggja i utlandet og samtidig oppfylla norsk sokkel sine krav til kvalitet?

- I Thailand har me hatt verft sidan 1998. Me har skolert dei tilsette til å jobba etter norsk sokkel sine krav (Norsok). Når det gjeld dei nytilsette ingeniørane våre i Singapore har me til dømes nå 70 av dei til opplæring i Haugesund. Fleire vil koma etter kvart, seier Matland.

Han legg til at skilnaden i byggjekostnadar mellom Thailand og Norge er stor. - Sjølv om kostnadane med transport av den ferdige dekkskonstruksjonen frå Asia til Norge blir tatt med, kan skilnaden vera nær 30 prosent, seier Erling Matland

Rekordhøg aktivitet

I eit foredrag i Haugesund i går, der mange av representantane frå Rogalandsbenken på Stortinget var tilstades, peika Matland på at investeringsnivået på norsk sokkel vil halda seg jamt høg i ti år framover.

- Skilnaden frå tidlegare år er at nivået er historisk høgt og samtidig stabilt for mange år framover.

- Berre i år blir det truleg starta opp minst fire ulike utbyggingsprosjekt (Dagny, Draupne, Luna og Hild), som alle kunne vera aktuelle for Aibel å ta del i. Kapasiteten hos norske ingeniørar i denne bransjen er på to millionar timar, medan kundane våre treng 16 millionar timeverk.

Fleire tilsette i Norge

Men sjølv om det blir lite bygging av store nye installasjonar ved norske verft i framtida, kjem Aibel til å auka talet på tilsette, både av ingeniørar og av operatørar. I Haugesund blir det i løpet av mars totalt 2000 Aibel-tilsette. I Stavanger kan det bli 1250 i løpet av året.

- Kva skal alle desse jobba med framover?

- Vedlikehald og ombyggingsoppdrag ved eksisterande plattformer. Dette fører med seg produksjon av mange, men mindre nye modular. Slike modular lønnar det seg ikkje å frakta langvegs. Matland viser også til Aibel si satsing på bygging av plattformer til offshorevindkraft.

- I Haugesund har Aibel nær 100 ingeniørar som jobbar med offshore vindkraftanlegg til tysk farvatn.

Følg oss på Twitter.com/AenergiNO