Blir framtidsbilen ein elbil? Dette meiner bransjen:

Informasjonsdirektør

Paul Hegna, Harald A. Møller (importerer Volkswagen, Audi, og Skoda)

–I eit perspektiv på 20 til 40 år vil elbilar, eventuelt brenselcellebilar, vera svært aktuelle. Dette fordi oljeressursane alt har passert toppen og oljeprisen vil stiga. Bransjen må derfor finna alternativ. I 2020 vil elbilane vera introduserte på marknaden, men vil likevel berre utgjera ein ganske liten del. Me reknar med at bilar med elmotor som hovuddrivkjelde vil utgjera 5–10 prosent av salet i Europa om 10 år. I Norge er avgiftsregimet veldig bra, så her kan bildet sjå litt annleis ut.

Informasjonssjef

Espen Olsen, Toyota Norge:

–Elbil kan bli framtidsbilen, men mange har også tru på at den ladbare hybridbilen vil ta ein stor del av marknaden framover. Kor stor del av marknaden el- og hybridbilane vil ta, kjem veldig an kva rammevilkår dei vil få. Norge har lagt godt til rette for elbilar og berre Monaco har fleire elbilar per innbyggjar enn Norge.

Hydrogenbilar ligg nok litt lenger fram. Utfordringa her er både pris og manglande infrastruktur.

Pressetalsmann

Tore Løvig, Volvo Norge:

–Ja, det er vel ikkje tvil om at alle større bilprodusentar har klare eller utviklar program for elbilar og plugin-hybridar. Volvo vil i første omgang ha ein rein elbil, C30, i produksjon frå veke 10–11. I tillegg utviklar me ei stasjonsvogn V70 med diesel-hybridløysing som vil komma for sal neste år. Truleg vil salet av elbilar skyta stadig meir fart framover, parallelt med batteriutviklinga. Det er lett å henga seg på estimat som spår at maksimalt 10 prosent av dei selde bilane i 2020 blir elbilar eller elhybridbilar. Samtidig kan det brått skje store gjennombrot i teknologiutviklinga som endrar bildet og gjer elbilen endå meir interessant.