Norges største satsing utanlands

Aldri før har eit norsk industriselskap satsa så tungt i eit anna land. Hydro saman med den lokale partnaren, Qatar Petroleum, byggjer verdas største aluminiumsverk, i eit byggjetrinn.

Hydros del av investeringa er halvparten, det vil seia 20 milliardar kroner. Men Hydro satsar ikkje berre pengar, men også eigne folk og prosjektstyring.

Les også: Bur på brakke i to år

Ormen Lange

– Me har valt og leia dette prosjektet sjølve, mellom anna på grunn av ferske og gode røynsler etter utbygginga av gassprosjektet Ormen Lange, seier konserndirektør i Hydro for nye utbyggingar, Tom Røtjer.

Han legg til at Hydro dessutan dreg nytte av ferske erfaringar etter bygginga av nytt aluminiumsverk på Sunndalsøra.

Nå er vel 100 nordmenn på plass i Qatar. Dei fleste er førebels opptekne med leiing og oppfølging av sjølve byggearbeidet der meir 15.000 anleggsarbeidarar frå 42 ulike land er engasjert.

Heile verda

Dessutan er organisasjonen, som skal starta og driva aluminiumsverket, under oppbygging leia av karmøybuen, Truls Gautesen.

I løpet av neste halvår vil 300 nordmenn vera på plass i ørkensanden i Qatar.

– Me tar så og seia hele verda i bruk til produksjon av delar og utstyr til dette nye aluminiumsverket, seier Tom Røtjer, som står på farten til å besøkja ein stor underleverandør i Kina som produserer overbygget til alle dei 710 elektrolysecellene i verdas største aluminiumsverk.

Utfordringar

Hydros prosjektdirektør i Qatar, Erik Smith har vore gjennom mange store utfordringar når det gjeld å halda oppe tempoet i byggearbeidet.

– Å skaffe erfarne arbeidsleiarar har vore ein bøyg. Dessutan har det vore periodevis mangel på materialar som sement og armeringsstål, seier Smith. Han legg til at i ørken er det underleg nok mangel på sand av rett kvalitet. Sanden har oftast for stort innhald av salt. Dessutan må all stein importerast, seier prosjektdirektøren, som legg til at framdrifta nå er berre eit lite hakk bak planen.

Lånefinansiering: Finansieringa av gigantutbygginga var på plass i grevens tid. Avtale om lån av 2,6 milliardar dollar blei underteikna berre tre til fire veker før opptakten til finanskrisa, fortel Qatalum-sjefen Truls Gautesen.

Han legg til at det ville ikkje vore mogeleg å inngå ein slik låneavtale i dag.

Men dersom ein låneavtale hadde blitt inngått i dag ville, etter det Aftenbladet erfarer, prosjektet ha blitt nær 1 milliard kroner dyrare sett over prosjektet si levetid.

Auke i byggelånsrenta aleine kunne ha auka kostnadene med 300-400 millionar kroner.

Gasspris

Hydro-leiinga vil ikkje ut med kva Qatalum må betala for gassen som blir nytta i gasskraftverket.

– Dette er ein forretningsavtale mellom to partar, som me ikkje kan offentleggjera, seier Truls Gautesen. Men etter det Aftenbladet erfarer ligg gassprisen på rundt 20 øre pre kubikkmeter, noko som er om lag ein tidel av den prisen norsk gass blir seld for i Europa.

Hydro har planar om eit neste byggetrinn i Qatar, som vil kunne dobla aluminiumsproduksjonen frå 585.000 tonn årleg til 1,2 millionar tonn. Men da må Qatalum kjøpa meir gass. Gasskraftverket må utvidast frå 1350 megawatt til 2000.

– Me treng gass til gunstig pris før me kan setja i gang neste byggjetrinn, seier konserndirektør Røtjer.