Vind-kontrakt til Dubai

Leverandørselskapet til olje- og gassindustrien fekk sommaren 2011 sin første kontrakt innan havvind. Aibel sin kontrakt med ABB er verd 1,7 milliardar kroner.

Når det gjeld kontraktsverdien for avtalen med Drydock World, vil Aibel av konkurranseomsyn ikkje å gå ut med kontraktsverdien, opplyser kommunikasjonsdirektør Bjørg Sandal.

Vindplattforma Dolwin Beta, tidlegare kalt Dolwin 2, skal stå i eit stort vindparkområde ved Helgoland på tysk sektor i Nordsjøen. Plattforma blir like stor som ein fotballbane og blir ikkje så ulik ein vanleg oljeplattform å sjå til.

Skal omforma straum

- Jobben plattforma skal gjera er å omforma vekselstraum frå vindmøllene til likestraum, før straumen blir sendt til land i sjøkablar. På denne måten unngår ein for stort straumtap på vegen inn til land, seier Sandal til Aftenbladet.

Administrerande direktør Jan Skogseth seier i ei pressemelding at Aibel har brukt mykje tid på å finna rett underleverandør.

- Drydocks World er eit anerkjent selskap. Eg er sikker på at dei kan levere i tråd med våre strenge krav til kvalitet, helse, miljø og tryggleik, seier Skogseth.

- Dolwin Beta er ei stor plattform, og Drydocks World sitt verft i Dubai er stort nok til å handtera storleiken, forklarer Skogseth. Plattforma er vel 90 meter lang og 70 meter brei.

Plattforma er utvikla gjennom eit samarbeid mellom Aibel og ABB. ABB har overordnaprosjektansvar og leverer konverteringsutstyr og kablar. Aibel har ansvaret for design og bygging.

Neste stopp: Haugesund

Bygginga i Dubai startar i juli. På det meste vil 1800 personar arbeida med plattforma som skal leverast til Norge i desember 2013.

I Haugesund skal plattforma utrustast med konverteringsutstyr, før ho blir slept ut til Dolwin-feltet sommaren 2014.

Aibel har i dag 100 personar som jobbar med vindkraft i Haugesund og denne staben skal etter kvart utvidast til 150. I alt jobbar 2000 personar for selskapet i Haugesund.