Nor Lines-skip halde igjen i Oslo

Ved fleire av Nor Lines sine godsrutebåtar skal ein etter utflagginga til Færøyane ha slite med å rekruttera mange nok kvalifiserte styrmenn og kapteinar.

MS «Cometa» kom sist veke frå Hirtshals via Fredrikstad til Oslo. Der blei den norske kapteinen om bord sjukmeldt og gjekk i land. Bakgrunnen for sjukmeldinga skal mellom anna vera at han dei siste dagane har hatt for mange og lange vakter på brua, ettersom skipet har mangel på navigatørar med sertifikat for å segla langs norskekysten utan los om bord.

Hamnestatkontroll

Torsdag gjekk Sjøfartsdirektoratet om bord i «Cometa» ved kai i Oslo for å gjennomføra hamnestatkontroll på det færøysk registrerte skipet.

- Etter inspeksjonen har Sjøfartsdirektoratet kome med to pålegg til reiarlaget, opplyser kommunikasjonsdirektør Eilif Fjon i direktoratet.

Han legg til at desse pålegga medfører at skipet måtte haldast tilbake inntil pålegga blei utbetra.

- Tilbakehald er den strengaste reaksjonsforma etter denne typen inspeksjon, seier Fjon. Han seier vidare at det eine pålegget er gitt fordi nøkkelpersonell om bord manglar kunnskap om bruk av tryggjingsutstyret.

Nye nøkkelpersonar

- Det andre pålegget kom fordi nøkkelpersonell om bord ikkje hadde gått gjennom rutinar for å bli kjent med skip og utstyr.

I tillegg gav Sjøfartsdirektoratet eit pålegg som måtte rettast før fart. Det mangla påteikning frå færøyske styresmakter i sertifikata til to av offiserane om bord.

Skipet fekk segla vidare fredag kveld.

Sjukmelding

- Kapteinen om bord blei sjukmeldt i Oslo, og me laut skaffa ein vikar frå eit av våre andre skip, seier administrerande direktør i Nor Lines, Toralf Ekrheim.

Han legg til at når ein kaptein er ny om bord tar det tid å gå gjennom tryggjingssystema.

- Er denne hendinga eit utslag av vanskar i reiarlaget med rekruttering etter utflagging?

- Dette er ei konkret hending med sjukmelding som av og til skjer og som må taklast, seier sjefen i Nor Lines.

Alle skip utflagga

Heile flåten av 11 godsruteskip i Nor Lines sin flåte er blitt flagga ut. Dei fleste skipa seglar nå under færøysk flagg.

Det har ført til at mange av dei norske sjøfolka om bord har gått i land. Men framleis seglar nær 25 norske kapteinar, styrmenn, nokre maskinsjefar og arbeidsleiarar på dekk med Nor Lines sine skip langs kysten.

Dei norske sjøfolka som er att i reiarlaget, har fått tilbod om å bli tilsette i det nye færøyske dotterselskapet til Nor Lines.

Men ingen av dei om lag 25 norske sjøfolka skal ha sagt ja til å halda fram om bord under færøysk flag. Nor Lines står difor framfor ei stor utfordring med å skaffa kvalifiserte folk til erstatning.

Frå Færøyane

Ifølgje dei norske sjøfolka om bord i Nor Lines sine skip som Aftenbladet har snakka med, er det vanskeleg å skaffa nok kvalifiserte navigatørar frå Færøyane.

Når ein seglar langs norskekysten treng styrmenn og kapteinar såkalla farledsbevis, ein slags kjentmannsprøve. Denne tar det tid å kvalifisera seg til. Utan farledsbevis må skipet ta los om bord. Det kostar dyrt for reiarlaget.

Dei norske sjøfolka om bord, som utgjer nøkkelpersonell på fleire av skipa i Nor Lines flåten har ei oppseiingstid på mellom tre og seks månader.