Hå-ordføraren rasar etter biopark-avslag

Mjåtveit er svært skuffa over at regjeringa no vrakar det som er kalla jærsk «månelanding», Ivar og Lyse sine planar for landets største biogass- og gjødselfabrikk i Hå.

LES OGSÅ: Regjeringen parkerer Jærens «månelanding»

Politikk

– Og dette er det Senterpartiet som frontar. At det er dei som kjører dette løpet er eg også svært skuffa over. Dette er politikk på høgt plan. Her har me lagt opp til eit løp, og bønder har satsa framtida på dette. Som ordførar i landets største husdyrkommune kan eg ikkje berre sitja stille og sjå på dette.

– Kva gjer du no?

– Me må prøva å tenkja andre måtar. Eg veit ikkje enno. Dette må me drøfta.

– Har du hatt kontakt med regjeringa?

– Nei, ikkje enno. Eg fekk nettopp vita det.

To tunger

Mjåtveit opplever at regjeringa talar med to tunger.

– Unge bønder vert oppfordra til å satsa. I festtalar er det snakk om biogass og om miljøvennleg jordbruk. Og så får me dette etterpå. I praksis er dette ein beskjed om at me har for mykje her på Jæren og at me får greia oss sjølv.

Starta mindre

– Hadde du venta at det skulle gå å få dette til?

– Ja, eg hadde forventa at me i alle fall kunne fått til noko. Me kunne begynt litt meir forsiktig. Me kunne til dømes ha starta med høns og broilerar og mink og så kunne anlegget vore bygt ut seinare.

– Her kjem me til å mobilisera. Me må seia kva me meiner. Dette var ein særdeles dårleg julegåve frå regjeringa.

Mjåtveit lurer på kva dei unge bøndene tenkjer.

– Mange av dei har nok med å halda banken frå livet, og så får dei dette på toppen. Dei har meir enn nok å tenkja på frå før.