Milliardsatsing i vinden til havs

Det mest konkrete prosjektet for det nye selskapet, som blir stifta torsdag, blir videreutvikling av planane om bygging av 78 botnfaste vindmøller til havs få kilometer utanfor Harøy i Sandøy kommune i Møre og Romsdal.

Blir planane realiserte, vil dei nye havvindmøllene kunne produsera 1 TWh (terrawattimer) årleg. Dette er nok straum til å forsyna 49 000 hushald. Investeringstrongen er på mellom fire og fem milliardar kroner.

Ormen Lange

- Trongen for ny kraft er stor i Møre og Romsdal. Krafta fra eit utbygd Havsul 1 kan gå direkte til Ormen Lange-anlegget som produserar gass for eksport til England, seier Håkon Sandvik, dagleg leiar i Vestavind Kraft.

Vestavind Kraft er eigd av sju kraftselskap på Vestlandet, deriblant Haugaland Kraft, Sunnhordland Kraft og BKK (Bergenhalvøen kommunale kraftselskap) i Bergen.

Vestavind har til nå utvikla vindkraftprosjektet på sjø og land. Men det nye selskapet, som blir skipa torsdag, skal, ifølgje Sandvik bli, dei sju kraftselskapa sitt selskap for satsing på vindenergi til havs.

Manglar konsesjon

Vestavind Kraft kjøpte 1. juli Havsul 1- prosjektet frå selskapet Havgul. Havsul 1 fekk konsesjon frå Norges Vassdrags- og Energidirektorat. Men denne avgjerda er seinare blitt anka. Anken ligg nå til handsaming i departementet.

- Me har eit visst håp om at anken kan bli ferdighandsama før stortingsvalet, seier Håkon Sandvik i Vestavind Kraft.

Vestavind Kraft eig frå før delar av prosjektet Havsul 2, som heller ikkje har fått konsesjon.

På grunt vatn

Havgul, som har utvikla vindmølleprosjekta Havsul 1, 2 og 4 utanfor Møre-kysten, er framleis medeigar i Havsul 2.

Begge prosjekta inneheld planar om botnfaste og store vindmøller. Kvar vindmølle vil få ein effekt på 4,5 megawatt. Navet i vindmølla skal vera 95 meter over havet og rotordiameteren blir på heile 120 meter.

- Dette er større møller enn dei som hittil er bygde til havs i Danmark, Tyskland og Storbritannia, seier Harald Dirdal, dagleg leiar i Havgul.

Han legg til at møllene skal byggjast på grunt vatn.

Finansiering

-I Havsul 1-prosjektet er havdjupet mellom fire og 35 meter og mellom seks og 11 kilometer fra land, seier dagleg leiar i Havgul.

Men investeringane blir store.

- Her blir trong for offentleg medverknad på finansieringssida, seier dagleg leiar i Vestavind Kraft Håkon Sandvik.