Motvind for Statoil sin havvindpark

- Me opplever framleis at me har eit godt samarbeid med Statoil i prosjektet, der me bidrar med kvar vår type spisskompetanse. Det er samarbeidet med vêrgudane me har slitt med i vinter, seier pressetalsmann Torbjørn Steen i Statkraft.

Eitt av problema er at installasjonen av vindmøllene går seinare enn planlagt, på grunn av sterk vind og høge bølgjer. Ekstremvëret i haust og vinter har medført nye forsinkingar for dei to norske selskapa si havvindsatsing til 10 milliardar kroner.

Vindparken ligg eit par mil utanfor strendene ved badebyen Wells-next-the-Sea i Norfolk i England.

Statkraft og Statoil eig halvparten kvar i prosjektet.

Steen håpar vêret blir like dårleg neste vinter, når vindparken er kommen i full i produksjon med 88 vindmøller.

- Det er for tidleg å seia noko om Sheringham Shoal vil bil mindre lønsamt enn me først trudde, legg han til.

Ulike vurderingar

Forsinkingar og kostnadsoverskridingar er grunnen til at Statkraft skriv ned verdien av sin del av Sheringham Shoal med 338 millionar kroner.

Medan dei same forholda altså ikkje gir grunn for Statoil til å skriva ned verdien av sin eigardel, sjølv om dei også gjorde ei vurdering av nåverdien av vindparken for 2011.

- Me har brukt ulike modellar for vurderinga av nåverdien av anlegget, og desse kan gi ulike svar. Vår konklusjon ved kvartalsframlegginga i sist veke, var ikkje å skriva ned verdien av prosjektet, seier pressetalsmann Morten Eek i Statoil.

Torbjørn Steen i Statkraft understrekar at sjølv om dei ekstra kostnadene er uønska, så rokkar dei ikkje ved selskapet sine planar og ambisjonar om å satsa på havvind, i samarbeid med Statoil.

- Statkraft ønskjer framleis å ha ei industriell rolle innan havvind. Me vil utvikla ny kompetanse og skapa moglegheiter for norsk industri, seier Steen. Han viser til at Sheringham Shoal er eit pionérprosjekt.

- Situasjonen me nå opplever er utfordrande, men gjennom vanskane me opplever nå opparbeider me oss erfaringar og kompetanse som vil komma nye prosjekt til gode.

Åtte vindmøller i drift

Verken Statkraft eller Statoil vil opplysa kor stor kostnadssprekken er for prosjektet.

Venting ved kai på grunn av mykje uvêr, har gjort at installasjonen i haust og vinter har stoppa opp i lange periodar. Sist vinter fekk Statoil problem med at skipet som skulle brukast til installasjon av fundamenta, var for lite robust.

- Me ser nå på om me kan redusera ekstrakostnadene som har komme til, blant anna gjennom inntekter frå vindturbinane som alt er komne opp og er i produksjon. Totalbildet vil me ikkje kjenna før prosjektet nærmar seg ferdigstilling, seier Morten Eek i Statoil.

Etter planen skal i alt 88 vindturbinar stå klar på seinsommaren i år. Til nå har 28 vindturbinar komme opp. 8 av dei er sett i produksjon og leverer straum i kablar til land. Dei har til nå levert betre enn forventa.

Utbygginga på Sheringham Shoal blir den første store satsinga på botnfaste havvindmøller for Statoil, i samarbeid med Statkraft.

Erfaringa skal dei to norske selskapa bruka i det vidare arbeidet fram mot konsesjonssøknad og investeringsavgjerd for gigantparken Doggerbank. Denne utbygginga kan bli 30 gonger større enn Sheringham Shoal.