Næringsliv og fornybar energi blir noko av det Sp-leiar Liv Signe Navarsete kjem til å snakka mest om både i landsmøtetalen sin, framover mot valet: Landsmøtet kjem til å banka at «omstilling til eit grønt næringsliv med industrialisering av fornybar energi» skal vera den eine av dei tre hovudsakene til partiet framover. Samferdsle og «velferd der folk bur» (skule og omsorg) dei to andre.
Statvind
Navarsete er viss på at fornybar energi vil bli ein ny stor industri med tusenvis av arbeidsplassar i Norge, men det krev at staten blir langt meir offensiv på dette feltet framover:
- På same måten som staten var aktiv i starten av oljeeventyret, må staten vera aktiv i satsinga på fornybar energi. Då fekk me Statoil, nå treng me eit StatVind, seier Navarsete til Aftenbladet. I framlegget til stortingsprogram for 2009- 13 går ein samrøystes programkomite i Senterpartiet inn for å oppretta eit eige selskap, eit StatVind, som skal vera motor i forsking, utvikling og kommersialisering av vindkraft på land og til havs.
- Kva meir må til for å skapa tusenvis av nye grøne arbeidsplassar?
- Eg kan ikkje røpa alt på førehand, ler Navarsete.
Støtte
- Sp har hatt energiministeren denne perioden og ikkje ei vindmølle er bygd. Er det då ikkje temmeleg dristig å gjera fornybar-satsing til valkampsak?
- Me har auka løyvingane til fornybar energi, energiomlegging og energieffektivitet med 350 prosent sidan 2005. 284 nye prosjekt har fått støtte i 2008. 188 småkraftverk er starta opp. Me arbeider nå med å få til ei ordning med grøne sertifikat. Me har gjort mykje, men på langt nær nok. Ein grunn til at me løftar dette fram som ei stor valkampsak er at me ønskjer auka satsing, svarar Navarsete.
Småbedriftene
Sp vil vera det fremste partiet for små og mellomstore bedrifter.
Det skal Senterpartiet mellom anna klara ved å kjempa gjennom at formueskatten skal fjernast på arbeidande kapital. I dag betaler bedriftene formuesskatt av maskinar, verkstadhallar osv.
- Det er uheldig og hemmar nyskaping, meiner Navarsete og Sp som også vil auka botnfrådraget.
For å letta gjera det lettare å overta ei familieeigd bedrift, vil partiet fjerna arveavgifta. - Dette er også viktig for å sikra lokalt eigarskap, understrekar Navarsete.
Nyskaping
I programmet som landsmøtet i Sp kjem til å vedta til helga, står det at den offentlege forskingsinnsatsen mot næringslivet først og fremst må rettast inn mot dei små og mellomstore bedriftene. Å fjerna arbeidsgivaravgifta i tre år for nyetablere kunnskapsbedrifter er eit anna nytt punkt.
- Ap og LO heng tett saman, SV opplever seg nærmast som ein forlenga arm av miljø- og fredsrørsla og nå vil du altså vera NHO sin beste ven?
- Me snakkar godt med NHO og eg er mykje ut på bedriftsbesøk. Det er alltid nyttig. Når me nå blankpussar og løftar fram næringspolitikken vår, er det fordi det er grunnleggjande for å byggja landet og for å stansa sentraliseringa.
Soria Moria 2
Fornybar energi og grønt næringsliv vil stå høgt oppe på Senterpartiet si kravliste i Soria-Moria-2-forhandlingane, forsikrar Navarsete.
- Mot oljeutvinning i Lofoten og Vesterålen blir også viktig. Og skal me lukkast med å utvikla arbeidsplassar i heile landet, er det å få gjennomført 45 prosents auken til samferdsel som me legg opp til i planen heilt grunnleggjande, understrekar Sp-leiaren. Men det einaste absolutte kravet blir Nei til EU.
Kommentarer