–Blir det bygt ut med 2000 vindmøller på Doggerbank, vil dei viktigaste fiskefelta i Nordsjøen verta stengde for all framtid.
Det er Kåre Vea, fiskar og fiskebåteigar i tallause generasjonar bakover, som seier dette. Han seier vidare at fiskeria på Doggerbank dei siste åra har gitt avgjerande driftsgrunnlag for trålfiskarane frå mellom anna Eigersund, Karmøy og Bømlo.
–Doggerbank har dei klart rikaste og viktigaste tobisfelta i Nordsjøen. Her blir det også fiska store mengder brisling og rødspette samtidig som det er viktige oppvekstområde for sild og makrell.
I dette området har fiskarar langs heile kysten av Sør- og Vestlandet fanga fisk sidan 1800-talet, seier Kåre Vea.
Gamle rettar
–Eg er difor mildt sagt forundra over at britiske styresmakter saman med norske selskap brått kan setja fiskerinæringa, gamle næringstradisjonar og rettar til side. Slik saka er blitt framstilt i media finst her ingen konfliktar og det berre er å tura fram for bygging av klimavennlege vindmøller, seier Kåre Vea.
Heile tobisfangsten
–I fjor fanga norske fiskarar 27.500 tonn med tobis på Doggerbank, opplyser dagleg leiar i Sør Norges Trålerlag, Harald Østensjø. I fjor var fisket etter tobis stengt i norsk del av Nordsjøen. Men på grunn av ein avtale mellom Norge og EU kunne norske industritrålarar fanga tobis i EU-farvatn, saman med danske fiskarar.
–Me kjenner ei viss avmakt i høve til dette veldige vindkraftprosjektet, som skal byggjast i britisk del av Nordsjøen, seier Østensjø.
Statoil som lyspunkt
–Lyspunktet er at dei to norske selskapa Statoil og Statkraft er med i konsortiet som skal utvikla og byggja. Statoil har lang røynsle i å måtta ta visse omsyn til fiskerinæringa. Det håpar me selskapet vil gjera sjølv om utbygginga skal skje utanfor norsk sokkel, seier Østensjø, som lovar full merksemd og stort trykk på denne saka i tida framover.
–Me vil mellom anna bruka tida framover til å kartleggja brukarinteressene i området og gjennom dialog finna fram til løysingar som kan leggja grunnlag for sameksistens og minimering av potensielle konfliktar, seier Øistein Johannessen, informasjonssjef i Statoil.
Dramatisk i Danmark
For danske fiskarar er Doggerbank enda viktigare fiskefelt. Henrik Lund, som er biolog og tilsett i Danmarks Fiskeriforening, seier at om lag 70 prosent av all tobis som blir fanga av danske fartøy blir fanga på Doggerbank. År om anna utgjer dette 200.000 tonn. Blir danske fiskefartøy stengt ute frå Doggerbank vil det tyda eit tap på mellom 150 til 200 millionar danske kroner, seier Lund.
Målet til Danmarks Fiskeriforening er å påverka utbyggingsplanane. –Vindmøllene må plasserast slik at det kan opnast trålsoner på delar av Doggerbank. Utan at slike omsyn blir tatt vil det vera uråd å tråla mellom vindmøllene ettersom dei blir bundne saman med elektriske kablar på botn.
Naturvern
Lund peikar også på det paradoksale i at britiske, nederlandske og tyske styresmakter alt har peika ut verneområde på kvar sin del av Doggerbank.
Dette skal ha skjedd i samsvar med EUs habitatdirektiv og under programmet Natur 2000. Målet er å verna typiske område med sandbankar.
–Det er difor svært underleg at same område nå blir planlagt bygt ut med vindmøller. I Danmark blir det ikkje bygt ut vindparkar i slike verna havområde, seier Lund i Dansk Fiskeriforening.
Kommentarer