Og blautare skal det bli

Føler du at årets september har vore ekstremt våt? At regnet ausar ned natt som dag, og at det einaste lysglimtet er utsikt til lågare straumrekning?

- Jo, hausten har til nå vore våtare enn normalt, stadfestar meteorolog Roar Inge Hansen ved StormGeo. Og det trass i at september også normalt sett er den våtaste månaden i Rogaland.

Løftar me blikket, har klimaforskar Helge Drange lite trøst å komma med.

Meir regn om hundre år

- Fram mot år 2100 ventar me at nedbøren på Sørvestlandet kan auka med 20-25 prosent, seier han.

Femåringane som jublar i sølepyttane i Sandnes kan først som sist  venna seg til at regnet bøttar ned. Når dei ein dag sit på gamleheimen, vil det altså regna 20-25 prosent meir på Sørvestlandet enn det som er vanleg i dag.

Les også

Kan ikkje måle regnet

Undrar du kor mykje det regna i går? Sorry, målestasjonen på Våland funkar ikkje.

Fint dei siste åra

Årets september kjennest kanskje ekstra guffen fordi det i seinare år ofte har vore mykje varmt og fint vêr i overgangen mellom sommar og haust.

- September har dei siste 10-15 åra vore ein god del tørrare enn i normalperioden, som er mellom 1961 og 1990. Og så trudde me gjerne det skulle fortsetja, kommenterer Hansen. Han legg til at trenden dei siste åra har vore at det kjem meir regn i oktober-november enn tidlegare på hausten.

Til nå i år har det komme 30 prosent meir nedbør enn normalt i Stavanger-området, opplyser Storm-meteorologen.

Våtare og meir ekstremt

I eit lengre tidsperspektiv er det nettopp meir nedbør som er trenden, opplyser klimaforskar Helge Drange ved Bjerknessenteret i Bergen.

- Dette er ein direkte følgje av global oppvarming, fordi varm luft kan halda på meir fukt enn kald luft.

- Betyr det at årets septembervêr blir det me kan venta oss framover?

- Nei heldigvis kan me ikkje venta oss slikt vêr kvart år. Det er naturlege variasjonar: Nokre år er våte, andre er tørre. Men i tillegg ser me at nedbøren over lengre tidsperiodar aukar på nordlege breiddegrader. Frå år 1900 til 2008 har nedbøren på hausten auka med 25-30 prosent på Sørvestlandet, seier Helge Drange.

Kan ikkje varsla tiårsvêr

Auken vil halda fram utover dette hundreåret i denne delen av Norge: forventa auke er 20-25 prosent meir regn.

- Men korleis vêret blir neste år eller dei neste 10, eller 20 åra, er umogleg å seia, fordi me ikkje kan varsla dei naturlege variasjonane, seier Drange. Dei siste 50 åra har naturen endra seg raskare enn det klimamodellane har klart å fanga opp.

- Personleg trur eg derfor at auken i nedbør kan bli endå større enn 20-25 prosent dette hundreåret. I tillegg blir regnvêret ofte meir intenst enn før, slik at større nedbørsmengder kjem på kortare tid. Men klimaforskarar ser ikkje for seg større og sterkare stormar i Norge som følgje av klimaendringane, seier han

Sjølv om Austlandet i år har hatt ein meir ekstrem regn-sommar enn oss på Vestlandet, er auken i nedbørsmengder generelt større på Sør-Vestlandet.

Les også

Varsler femårsflom i Rogaland

Restene av det som var orkanen «Katia» drar med seg store mengder regn til Vestlandet i dag og i morgen. Norges vassdrags- og energidirektoratets (NVE) varsler flom, og Rogaland vil bli hardest rammet.