Regjeringa vil gå til sjøs

Fleire tiår med festtalar om kor miljøvennleg det er å flytta frakt av gods over til skip og bort frå trailerar skal endeleg gi resultat i kvardagen.

– Me skal snu kvar stein for å få dette til, sa kyst- og fiskeriminister Lisbeth Berg-Hansen under skipsfartskonferansen i Haugesund i går.

Ho inviterte alle partar i transportnæringa på land og sjø til å koma med konkrete forslag innan 1. mai. Deretter skal målsetjingar og tiltak takast med i Nasjonal transportplan for tidsrommet 2014 til 2023. Denne planen skal vera ferdig neste år.

Trafikkulukker

– Regjeringa kan ikkje lukkast med dette aleine. Me må dra i lag. Fem prosent av dagens godstransport på veg kan flyttast over til skip og bane. Det utgjer 15 millionar tonn gods, seier kystministeren.

Ho legg til at meir transport av gods på sjø gjer vegane meir framkommelege, skapar færre trafikkulukker og betrar samtidig miljø og klima.

Fånyttes aleine

Statsråd Berg-Hansen lanserte regjeringa sin plan saman med nærings- og skipsfartsminister Trond Giske i Haugesund i går. Giske peika på at Norge kan aldri byggja vegar som heilt fjernar aukande bilkøar på land utan at me samtidig tar i bruk sjøen som transportveg i langt større grad.

Sjefen for godstransportselskapet Nor Lines i Stavanger, Toralf Ekrheim, helsar regjeringa sitt initiativ med glede.

- Eg håpar dette tyder slutten på prat og festtalar og at initiativet kan gi konkrete resultat, seier Ekrheim.

Han hevdar at det kan vera mogeleg å overføra så mykje som ein fjerdedel av godstrafikken på veg over til sjø.

Positivt omdømme

Trailerar langs vegane skal ta seg av last som må raskt fram, som til dømes fersk fisk. Skip kan ta seg av transporten av gods som ikkje må raskt fram. Ekrheim legg til at sjøvegen vil kunne gi næringslivet rimelegare transport, lågare vedlikehaldskostnader på vegane og samtidig skapa meir aktivitet i maritim industri langs kysten.

– Miljøvennleg varetransport vil også kunne skapa positivt omdømme til bedrifter som nyttar denne kystvegen, seier Ekrheim.

Straffar miljøtiltak

Nor Lines har tinga to nye skip som skal nyttast i godstransporten langs kysten. Dei to nybygga skal begge ha gassdrivne motorar.

– Dette gjer sjøtransporten enda meir miljøvennleg. Men dersom fleire nye godsskip skal ta i bruk naturgass som drivstoff, må styresmaktene endra avgiftssystemet, seier Ekrheim.

Han viser til at i dag får miljøvennlege gasskip tre gonger så høge avgifter som tradisjonelle skip fordi drivstofftankane i eit gasskip tar større plass om bord.

Følg oss på Twitter.com/AenergiNO

Gå til forsiden av Aenergi.no