SV: Høgare CO2-avgift til klima-tiltak

– Det er ingen grunn til at oljeindustrien slepp billegare unna enn ein vanleg bilist, seier SV sin miljøpolitiske talsmann Snorre Valen.

Regjeringa har lova at klimameldinga skal komma i løpet av 2012, etter fleire utsetjingar. Fleire sentralt plasserte kjelder i SV sa torsdag at det er viktigare at meldinga blir god enn at denne skal komma raskt.

Les også

Klimameldingen utsatt igjen

Klimameldingen blir tidligst lagt fram for Stortinget i juni etter nok en utsettelse, ifølge miljøminister Erik Solheim (SV). Mens Frp er fornøyd, advarer AUF sitt moderparti mot å bryte klimaforliket.

Dyrt eller upopulært?

Om kutta skal skje ute eller heime, er ein av dei store diskusjonane internt i regjeringa. Aftenposten skreiv sist veke at Finansdepartementet framleis står beinhardt på sitt: Dei meiner det blir for dyrt å ta to tredelar av utsleppskutta på heimebane slik det vart bestemt i klimaforliket.

I tillegg går klimadiskusjonen mellom regjeringspartia friskt rundt moglege nasjonale tiltak. For tiltaka som monnar er anten dyre eller upopulære. Eller begge deler.

Ikkje nokon sektor ønskjer å bli sitjande igjen med rekninga. Samtidig trengst det kutt over heile fjøla for å nå måla. Dersom kutta skal skje innanlands, kjem ikkje regjeringa utanom oljeindustrien, fastlandsindustrien eller transportsektoren som til saman står for rundt 70 prosent av CO₂-utsleppa.

Vil auka CO2-avgifta

Om Norge skal redusera utsleppa berre ved å kjøpa kvotar, vil norsk industri hamna i bakevja, meiner SV. Etter det Aftenbladet erfarer, vil partiet auka CO₂-avgifta på sokkelen for å oppretta eit klimatiltaksfond. Dei argumenterer med at fastlandsindustrien treng å omstilla seg og vera i fremste rekke på miljøvenleg teknologi.

– Eg skjønnar at Finansdepartementet får vondt i hjarta sitt av ein sånn idé, men me må få på plass løysingar. Me er for eit fond fordi me veit at det funkar, seier Snorre Valen og viser til Nox-fondet. Han legg til at partiet er fleksibelt og pragmatisk når det gjeld korleis eit klimafond skal innrettast.

SV og Senterpartiet har vedtak frå landsstyre og landsmøte om å oppretta eit klimafond med inntekter frå auka CO₂-avgift på norsk sokkel.

Zero: Kutt vil kosta

– Oljeindustrien har sluppe for lett unna, seier politisk rådgjevar Kari Elisabeth Kaski i miljøorganisasjonen Zero.

– Sidan 1990 har utsleppa frå olje- og gassverksemda auka med 80 prosent, medan fastlandsindustrien har redusert sine utslepp med 30 prosent, seier ho. Zero har i fleire år jobba hardt for oppretting av eit klimafond.

Organisasjonen sitt forslag går ut på å auka CO₂-avgifta frå dagens 200 kroner tonnet til 800 kroner tonnet. Slik kan eit norsk klimafond ifølgje Zero få tilført 10-12 milliardar kroner årleg. Organisasjonen foreslår at pengane skal gå som investeringsstøtte til fastlandsindustrien og oljeindustrien for å få realisert tiltak med høg kostnad.

– CO₂-avgifta på norsk sokkel er blitt halvert sidan 1998. Riksrevisjonen slo i 2010 fast at dagens nivå på avgifta har stadig mindre effekt på CO₂-utsleppa, seier Kaski. Ho legg til at det vart gjennomført viktige tiltak som reduserte utsleppa då avgifta kom, men at dei siste ti åra har vore eit kvileskjer.

Treng kutt ute og heime

Statssekretær Kjetil Lund (Ap) i Finansdepartementet ønskjer ikkje å kommentera klimameldinga direkte, men seier at det ikkje er snakk om enten eller, men både og. Det trengs både nasjonale og internasjonale klimakutt, seier han.

Følg oss på Twitter.com/AenergiNO