Skyhøge kostnader med karbonfangst på Kårstø

– Det finst knapt nokon kommersielle drivkrefter som vil gjennomføra slike investeringar på forretningsmessig grunnlag, seier Gassco-direktør Brian Bjordal, som mandag presenterte ein fersk Kårstø-rapport for olje- og energiminister Terje Riis-Johansen.

Bjordal viser til at tiltakskostnadane bak kvart tonn fanga CO ₂, ligg på over 1500 kroner.

– Samanliknar ein med dagens kvotepris på 150 kroner per tonn er er her eit stort gap som må fyllast, seier Bjordal.

Utsette Kårstø-reinsing

Regjeringa avgjorde i fjor vår at vidare arbeid med bygging av CO ₂-fangstanlegg for gasskraftverket på Kårstø skulle utsetjast medan Gassco laga ei nyt utgreiing.

Nå ligg utgreiinga føre. Den handlar om korleis tiltaka best mogeleg må samordnast for å få ned samla utslepp av CO ₂ frå Kårstø, både frå gasskraftverket og frå gassprosessanlegget.

2,5 millionar tonn CO2 frå Kårstø

For omlag 15 milliardar kroner vil ein kunne byggja eit CO _2-fangstanlegg.

Samtidig må ein flytta damkjelar som lagar damp til prosessanlegget nærmare gasskraftverket for å gjera CO ₂-fangsten enklare.

I tillegg må dampkjelar fyrast med eksosgass slik at konsentrasjonen i eksosgassen blir høgare og fangsten meir effektiv.

Ifølge dette alternativet kan samla CO ₂-utslepp frå Kårstø bli redusert frå 2,5 millionar tonn årleg til 0,7 millionar tonn.

23 milliardar kroner

Legg ein til rundt 8 nye milliardar kan ein også byta ut dagens kompressorar som trykker gassen ut til Europa frå Kårstø.

Dei er drivne av straum produsert av gassturbinar. Desse turbinanen kan bytast ut med nye elkraft drivne turbinar som hentar straum frå gasskraftverket med installert CO ₂-fangstanlegg på plass.

Etter ei slik omfattande investering kan over 2 millionar tonn CO ₂ bli fanga årleg på Kårstø.

Mykje uvisse

– Rapporten me har laga er ein forstudie der. Det er dermed knytta mange usikre tilhøve til investeringsanslaga, pluss/minus 50 prosent seier Bjordal.

Han peikar også på at det er uvisst kor mange driftstimar gasskrattverket vil ha på jamne i framtida.

– Uvisse er det også rundt kor mykje gass Kårstø-anlegget kan rekna med å kunne ta imot eit stykke inn i framtida, seier Bjordal.

Han legg til at dersom ein skal gå vidare med utgreiingsarbeidet er neste trinn å vidareutvikla eit eller fleire av alternativa for å koma nærare eit beslutningsgrunnlag.