Fakta må fram

Fellesnemnaren for Golfkrigen og Kosovo er bruken av utarma uran i Nato-ammunisjon. Både frå Nato-hald og frå norske styresmakter er det tidlegare blitt avvist at denne ammunisjonen skulle innebera nokon spesiell helsefare. Nå viser det seg at det norske forsvaret tok utarma uran såpass alvorleg at norske Kosovo-soldatar på førehand vart åtvara mot risikoen for å bli forgifta av dette radioaktive stoffet.

Me skal passa oss for å dra for raske konklusjonar. Erfaringar frå blant anna Hiroshima og Tsjernobyl tyder på at kreft som følgje av stråling treng lenger tid enn 1-2 år for å utvikla seg. Men sjukdomsbildet etter Golfkrigen og Kosovo er likevel så påfallande at alle krefter nå må setjast inn for å få klarlagt samanhengane. Og det seier seg sjølv at alle fakta må fram i lyset. Verken Nato eller nasjonale styresmakter kan leva med den uvisse og dei mistankar som nå kjem fram.

Ei anna, og endå alvorlegare sak er konsekvensane for befolkninga i områda der utarma uran er blitt brukt. Dersom miljøet deira er blitt forgifta for mange tiår framover, var det sanneleg litt av ei frigjering Nato stod for.