Gasskraftverk gir full gass

Gasskraftverket som Norge vegra seg mot å byggja gjennom ein 20 år lang miljøpolitisk strid, er blitt ei viktig brikke i energiforsyninga i iskalde Sør Norge.

Kraftverket produserer dagleg om lag nok energi til å dekka varmebehovet i heile Rogaland.

Etter at kraftverket på Kårstø blei opna hausten 2007 stod kraftverket ubrukt i meir enn eitt år.

Hjelp av finanskrisa

Men finanskrisa gjorde at gassprisen fall. Heilt sidan februar i fjor har det omstridde gasskraftverket vore i drift. Meir enn tre milliardar kilowattimar elektrisk straum er produsert (tre TWh).

Ein million tonn av klimagassen CO {-2} er samtidig sleppt ut i atmosfæren.

Naturkraft, som er eigd av Statoil og Statkraft må snart ut på marknaden og kjøpa seg CO {-2}-kvotar. Naturkraft er tildelt gratis utsleppskvotar av staten tilsvarande utslepp av 1,6 millionar tonn CO2 fram til og 2012.

Må kjøpa kvotar

Årleg får kraftverket tildelt frikvotar for 323 468 tonn CO {-2} for kvart av dei tre åra 2008, 2009 og 2010. Men 1. mars må gasskraftverket leggja frå utsleppsrekneskap for Statens Forurensingstilsyn og deretter ha ein plan for korleis vidare utslepp skal dekkast inn gjennom kjøp av kvotar. Prisen for kjøp av CO {-2}-kvotar er ikkje avskrekkande, om lag 120 kroner per tonn.

- Held vilkåra fram med dagens prisar på straum og gass er det grunnlag for vidare drift, seier informasjonssjef i Naturkraft, Geir Fuglseth.

- Men vil kjøp av CO ₂-kvotar kunne øydeleggja driftsmarginen?

- Det vil redusera utbyttet for eigarane, seier Fuglseth.