– Fiskarane let seg ikkje kjøpa

Det er dagleg leiar i Kystfiskarlaget Håvard Jacobsen, som seier dette.

Kystfiskarlaget går sterkt imot Oljedirektoratet (OD) sitt opplegg for sommaren utanfor Vesterålen og Senja.

• Les også: Seks uker med seismikk til sommeren

Oljedirektoratet føreslår at fiskarar, som har garn og line ståande i sjøen i område med planlagt seismikkskyting, skal få betalt for å halda seg borte frå fiskefelt i seks veker fra 29. juni.

• Les også: OLF: - Ikke part i saken

Sameksistens umogeleg

– Dette framlegget er eit prov på at det ikkje let seg gjera med sameksistens mellom oljenæringa og fiskerinæringa, seier Håvard Jacobsen.

Han legg til at oljenæringa må trengja vekk fiskerinæringa for å kunne utvikla seg.

– Denne faren har me alltid peika på dersom dei aktuelle havområda skulle opnast for oljeleiting. Problemet blir ikkje mindre om oljenæringa prøver å betala oss ut. Fiskarane er her for å kunne leva av fiskeri, seier Jacobsen.

Har førsteretten

– Kva skjer når seismikkfartøya kjem i sommar?

– Ifølgje lovverket tilhøyrer førsteretten den som er på feltet først. Det vil seia at seismikkfartøya må vika. Det reknar eg med at dei respekterar. Eg trur Oljedirektoratet skal få vanskar med å gjennomføra den panlagde seismikkskytinga i sommar, seier Jacobsen i Kystfiskarlaget.

Han få støtte frå Nordland Fylkes Fiskarlag, som er tilslutta Norges Fiskarlag. Fylkesfiskarlaget uttalar i ei fråsegn at det vil vera feil å leggja til rette for oljeverksemd i dette området, som fiskeriorganisasjonane tidlegare har sagt skal vera fri for oljeaktivitet. (Artikkelen fortsetter under bildet)

Grønt lys frå Fiskarlaget

Men moderorganisasjonen, Noregs Fiskarlag, er likevel villig til å prøve ordninga med frikjøp.

– Norges Fiskarlag er også imot oljeverksemd i dette området. Men når Stortinget ikkje høyrer på oss, må me likevel finna løysingar som gjer det mogeleg å driva fiskeri. OD har kome med eit forslag som me bør prøva ut i sommar, seier rådgivar Elling Lorentzen.

Eksplosjon i søknader

I fjor var første sesong med seismikkskyting i dette aktuelle området.

Etter den sesongen eksploderte talet på søknader til utvalet som skal handtera erstatningssøknader etter tapt fiske.

Orninga har eksistert sidan 1990. Fram til 2007 kom det knapt ein søknad, seier sekretær for utvalet Sarah Fagertun Eggereide i Fiskeridirektoratet.

– Men nå er det kome inn 140 søknader. Dei aller fleste har sin bakgrunn i seismikkskytinga utanfor Vesterålen og Lofoten i fjor sommar.

• Les også: Krever 16 millioner kroner i erstatning etter seismikk

Millionar i erstatning

- 25 av søknadane er ennå ikkje handsama. Men me får heile tida inn nye søknader, seier Eggereide.

Ho legg til at omlag 115 søknader er handsama og mellom fem og 10 millionar kroner er innvilga i form av erstatning for tapte fangstinntekter som fjølge av seismikkskyting.

– Erstatningsutbetalingane varierar frå 10.000 og inntil 200.000 kroner. Det er som oftast frå mindre fartøy under tjue meter at me får søknader. Fiskarane som søker, nyttar til vanleg mange ulike fangstreiskapar som garn, line, snurrevad og juksa, seier Fagertun Eggereide.

Blest om ordninga

Ho legg til at erstatningsordninga har fått ny blest og omtale etter seismikkskytinga utanfor Lofoten og Vesterålen i fjor sommar.

– Det har ført til at nemnda har mottatt søknader også frå fiskarar i andre havområde der ein også hevdar å ha blitt skadelidande av seiskmikkskyting.

Det er dermed vanskeleg å spå kor mange fleire søknader som vil koma, seier Eggereide i Fiskeridirektoratet. Ho legg til at det ikkje er sett nokon søknadsfrist. Men etter tre år blir grunnlaget for erstatningskrav forelda.