Bygger gasskip og gir miljøprofessorat

Nybygget er eit forsyningsskip (PSV) til om lag 400 millionar kroner, som er utvikla av STX i Ålesund. Skroget skal byggjast i Tulcea i Romania og bli utrusta ved STX sitt verft i Aukra.

Skipet skal vera ferdig i første kvartal 2012, heiter det i ei pressemelding frå verftsgruppa STX.

Miljøprofessorat

Samtidig gjer STX det kjent at dei saman med reiarlaget Olympic Shipping gir Høgskulen i Ålesund eit miljøprofessorat i form av ei støtte på seks milionar kroner over fem år.

Det heiter i pressemeldinga frå STX at ei viktig oppgåve for det nye professoratet blir å ta i bruk forskingsresulatat frå miljø rundt i heile verda og omsetja alt dette til praktiske løysingar om bord i miljøvennlege skip.

Null utslepp

STX viser også til at den høge oljeprisen saman med aukande fokus på miljø har ført til halvering av utslepp frå samanliknbare offshoreskip dei siste ti åra.

- Dette er berre starrten på ei lang utvikling i retning enda meir miljøvennlege skip på vegen mot visjonen om null utslepp, skriv STX i si pressemelding.