Bygger gigantverft på brasiliansk strand

Dette tyder at norsk skipsbyggingsindustri satsar kunnskap og ressursar i Brasil. Det er i praksis dei tidlegare Aker-verfta, nå eigd av koreanske STX-gruppa, som dreg til Brasil og grunnlegg eit nytt skipsverft for offshorefartøy.

STX Norway Offshore, som denne delen av STX heiter, har i dag mange verft i Norge, særleg på Sunnmøre der ein byggjer avanserte forsyningsskip og andre spesialiserte offshoreservicefartøy.

Støtte fra regjeringa

Denne verftsgruppa har saman med ein brasiliansk partner, PJMR, planar om å investera mellom 600 og 700 millionar kroner i Fortaleza i delstaten Ceara i Brasil.

Det nye verftet skal dekka eit område over 320 dekar og gi arbeid til 1500 personar. Det heiter i ei pressemelding frå STX Norway Offshore at etbaleringa i Brasil skjer for å kunne møta den aukande etterspørselen etter bygging av meir kompliserte skip i Brasil.

- Prosjektet forventar å kunne dra nytte av brasilianske gunstige finansieringsordningar som er støtta av regjeringa, heiter det mellom anna i ei pressemelding fra STX Europe.

Strategisk viktig

- Prosjektet er strategisk viktig for vårt forretningsområde, seier Roy Reite, som er sjef for bygging av offshoreskip i STX Europe.

STX, som den gongen heite Aker Yards, starta skipsbygging i Brasil for om lag 10 år sidan. Da kjøpte Aker eit skipsverft i Niteroi. Fra dette verftet er det sidan levert meir enn 20 offshorefartøy.

Verftet har åtte nye skip i ordreboka og har dermed arbeid fram til 2013.