Eventyrleg for Karmøy-bedrift i Vietnam

Høge, slake og frodige åsar, rolege avskjerma hamner, endelause solrike sandstrender, fiskerike fjordar med idylliske holmar og øyar som skapt for båtliv og naturoppleving i særs gjestmildt klima. Alt dette kan ha lokka vestlendingar med utferdstrong og etableringslyst.

Leiinga i Karmsund Maritime Offshore Supply har lete seg lokka til å byggja ein mekanisk bedrift i ein industripark utanfor byen Nha Trang ein liten times flytur nord for Ho Chi Minh byen.

Les også

Sjå bileta frå Vietnams oljeby

Vietnams oljeby heiter Vung Tau og ligg vel 12 mil nordvest for storbyen Ho Chi Minh (Saigon). Norske selskap er alt på plass.

Til oljeindustrien

– Me har i fleire år levert ymse produkt og finmaskinerte delar til oljeindustrien. 90 prosent av produkta våre går til eksport. Me har store kundar i Asia. Gjennom det nye selskapet i Vietnam kan me auka vår kapasitet og samtidig levera til våre norske kundar og til andre kundar som har etablert seg i dei store vekstmarknadane i Søraust-Asia, seier gründer og bedriftsleiar Ann Helen Hystad frå Karmøy.

Kvalitetssikring

Karmsund Maritime Vietnam Co. Ltd. har reist nye bygg i ein næringspark. Omlag 20 personar har fått sitt daglege arbeid her. Ingen norske er permanent med i leiinga. Men i lengre periodar er nøkkelpersonar frå verksemda i Norge på plass i Vietnam for å gi opplæring i maskineringsfaget og for å sjå til at gode rutinar blir innført for kvalitetssikring og styring og sameleis for økonomistyring.

– Målet er ISO-sertifisering neste år. Me har dessutan vore så heldige å fått knyta til oss dyktige folk på staden folk, som kjenner det politiske og byråkratiske systemet frå innsida, seier Hystad.

Båtflyktning

Viktig inspirasjon til etableringa i Vietnam er Minh duc Pham, båtflyktning frå Vietnam på 1980-talet. Han kom til Norge og til Karmøy der han tok fagutdanning og blei tilsett i familien Hystad si verksemd Kopervik Slip.

– Minh duc Pham med sin lokalkunnskap språkkunnskap og kontaktar har vore viktig for vår etablering, seier Hystad.

I haust har Minh duc Pham vore ved bedrifta i Vietnam i fleire månader for å vegleiia dei nye unge tilsette i maskineringsavdelinga.

– Dei er faglege dugande med solid utdanning men treng å læra seg gode arbeidsvanar, vera nøye, følgja kvalitetskrava i oljeindustrien og ikkje minst orden og system på arbeidsplassen slik at ein heile tida veit kvar ein finn verktøy og materialar, seier Minh duc Pham.

Kom frå Saigon

Tran van Ngoc er frå eit distrikt om lag midt i Vietnam. Han har fått si utdanning i Saigon eller Ho Chi Minh byen, som den tidlegare sørvietnamesiske hovudstaden nå heiter. Van Ngoc har arbeidd tre år i som sveisar i industrien i Saigon, men valde å søkja jobb hos nyskipa Karmsund Maritime i Nha Trang.

– Her er enklare å få husvære og langt billegare samtidig som eg har fått ein interessant og trygg arbeidsplass, seier Tran van Ngoc.

Kamos er første norske verksemd som etablerarar verksemd ved Nha Trang.

– Her er styresmaktene særs hjelpsame og flinke med å leggja til rette, seier Kjetil Rogde økonomisjef i Kamos.

Han legg til at tilgangen på stabil arbeidskraft i regionen er god nær utdanningsinstitusjon ar. Her er også nærleik til gode hamn og til flyplass. Dessutan kan me her få høve til å bidra til kompetanseheving og vidareutvikling av det lokale næringslivet, seier Kjetil Rogde.