GMC Maritime til Karmøy

Selskapet tilbyr i dag skipsreparasjon og vedlikehald ved djupvasskai i Mekjarvik og likeins på Kalhammaren i Stavanger. GMC Maritime nyttar også dei to dokkane hos Bergen Group Rosenberg på Buøy.

Nå skal selskapet samarbeida med skipselektronikk-leverandøren Vico på Bø i Karmøy om å nytta deira kai til skipsvedlikehald og reparasjonar. Ein arbeidsleiar er alt tilsett.

- I løpet av neste år skal me ha mellom 10 og 15 direkte tilsette ved denne basen. I tillegg til at me skal nytta lokale underleverandørar, seier dagleg leiar i GMC Maritime, Kjetil Bang-Olsen.

Konkurrentar

- Men er ikkje denne marknaden overmetta av ulike tilbod frå før på Haugalandet?

- Akkurat nå kan marknaden vera litt laber. Men me er overtydde om at aktiviteten vil auka. Det gjeld om å posisjonera seg til oppgangen, kjem, seier Bang-Olsen.

Han seier vidare at frå etableringa på Karmøy vil GMC Maritime kunne tilby ulike verkstadtenester ved bruk av mobilt utstyr som kan flyttast dit kundane ønskjer, enten det er til ein kai, eit verft eller og til industri på land.

Alle typar skip

Me satsar på å kunne tilby reparasjon, vedlikehald og mekanisk arbeid til alle typar skip ikkje berre til offshoreflåten, seier Bang-Olsen.

Han legg til at Haugalandet har svært mange dugande fagfolk på dette området som GMC nå vil satsa.

Søsterselskapet til GMC Maritime, GMC Elektro, har alt vore til stades ved Karmsundet ei tid og samarbeida med Vico om elektroinstallasjon- og reparasjon om bord i skip.

Vico-sjefen, Thore Østensen seier at det er ønskjeleg med eit breiast mogeleg maritimt næringsmiljø ved Bøvågen på Karmøy.