Siste skip ut frå Karmsund Maritime

Oppgåvene ligg i kø utanfor kysten og seglar nå bokstavleg forbi verftet ved Karmsundet.

- Ein stor jobb til omlag seks millionar kroner måtte me overlata til naboverftet, Aibel i Haugesund, seier reparasjonssjef Torleiv Mathiassen.

Han seier vidare at åtte ulike skip var book inn frå påske og fram til ferien.

550 skip

- Her er det snakk om større og mindre reparasjonar og overhalingar, som varer frå ei til tre veker. Alle krev opphald i tørrdokka, seier Mathiassen.

Han viser til at tørrdokka har sidan opninga i 1994 hatt besøk av 550 skip. - Me kan ta imot dei aller fleste store og små skip i offshoreflåten, i fiskeflåten pluss ferjer og lasteskip. Dessutan har me superlojale og dugande tilsette som har stått på helg og kvardag for å tilfredsstilla kundane.

Heile dette miljøet står nå i fare for å forvitra, seier Torleiv Mathiassen.

Fortvilar

- Dette er djupt fortvilande og frustrerande seier klubbleiar Helge Larsen.

Medan arbeidsoppgåvene og inntektene nærast flyt forbi oss, tar ikkje bustyret initiativ til å få ny drift i gang.

Dermed går konkursbuet også glipp av viktige inntekter, seier Larsen.

Han seier vidare at bustyrar, advokat Tom Hugo Ottesen for vel fjorten dagar sidan, då konkursen var eit faktum, uttrykte stor optimisme med tanke på å få i gang ny verksemd ved verftet.

Seinare har me knapt høyrt eit pip frå den kanten. Folk har vore entusiastiske og optimistiske. Men nå tærer uvissa på humør og psyke, seier klubbleiar Helge Larsen.

Bank og bustyre

SR bank, som har vore hovudbank for Karmsund Maritime Service, har stilt garanti for lønn til dei tilsette ut mars månad.

- Kan banken utvida denne garantien?

- Det ligg utanføre vårt mandat. Nå er det bustyret, som skal handtera situasjonen vidare, seier informasjonssjef Thor-Christian Haugland i SR-bank. Han legg til at lønnsgarantien blei gitt medan alle partar leita ei løysing for vidare drift ved verftet.

- Deretter gjekk verftet sjølv til skifteretten. Me heldt likevel fast ved lønsgarantien ut mars, seier Haugland.

På spørsmål om det er sannsynleg med rask avklaring og snarleg ny drift ved verftet, viser Haugland til at bustyret skal møtast på Karmøy fredag og der handsama slike spørsmål.

Kan mista lønn

Mellom dei tilsette breier det seg nå ei redsle for at utgiftene til advokatar og buhandsaming nå aukar så raskt at deira lønnskrav kan koma i fare.

Torleiv Mathiassen viser til at vanlegvis skal tilsette sine lønnskrav vera prioriterte fordringar etter konkursen.

Men løn og honorar i til dei som handsamar buet kjem visst nok aller først, seier Mathiassen, som er uroa for framtida.

Sjølv har han få år igjen til AFP-alder. - Den sjansen vil truleg gå frå meg, seier han.