Sprengjer plass til gamle Ekofisk

Ei stolt fortid heng att mellom fjella kring dei djupe og vakre fjordarmane i Vindafjord.

Her vart mange av dei gigantiske betongplattformene sette saman og gjort ferdige før spektakulære utslep til feltet. Stikkord er Statfjord C, Draugen og Troll.

Nå står Raunes og Vatsfjorden framfor ei ny hektisk epoke. Dei eldste oljeinstallasjonane i Nordsjøen er ferdige med si teneste og skal fjernast og hoggast opp.

To rivingar

AF Decom har alt vore i Vats sidan 2004. To rivingsoppdrag er alt gjennomførte. Først tok dei seg av riving og demontering av prosessutstyret, som stod på Ekofisk-tanken.

Den andre jobben omfatta fleire flammetårn og bruer frå andre nedstengde plattformer på Ekofisk-feltet.

Frå britisk sektor

Om ei veke kjem lastebøya frå det britiske Kittiwake-feltet til Vats for opphogging.

Den eksisterande kaien inst ved Raunes skal brukast til demonteringa. Men først skal lastebøya, som stikk 50 meter ned i djupet, delast i fire medan ho ligg oppankra ute i fjorden.

Dei fire delane skal løftast på land ved hjelp av kranskip.

Ekofisk

Ei omfattande utviding av baseområdet er sett i gang før AF Decom kan gå laus på den store Ekofisk-jobben.

AF Decom fekk nyleg ein omfattande kontrakt med nederlandske Heerema verdt 1,2 milliardar kroner. Kontrakten gir arbeid i fem år framover for nær 100 personar.

Heerema skal i fleire omgangar frakta utrangerte stålplattformer frå Ekofisk til Vats.

Arealet på land skal først utvidast frå dagens 25 mål til 65 mål. Store mengder stein skal sprengjast laus frå bratte fjellsider, ein holme like ved land skal sprengjast ned og nyttast som landfeste for den nye djupvasskaia på182 meterslengde.

Miljø

Miljøorganisasjonar, velforeiningar og naboverksemd, som driv produksjon av torskeyngel, fryktar konsekvensane av denne store utvidinga.

Raunes Fiskefarm er både redde for trykkbølgjer og for ristingar i samband med sprenging og for seinare utslepp til fjorden.

Eit tidlegare utslepp frå AF Decom av kvikksølvsulfid har vore med og skapt otte. - Dette var noko ingen forutsåg, hevdar Arne Skogheim, sjefen hos AF Decom i Vats. Han peikar på at mange tiltak er sett i verk etterpå, mellom anna stor utviding av reinseanlegg for prosessvatn og overflatevatn.

Resirkulering og avfall

Skogheim legg til at på den delen av kaien som blei oppgradert i 2004/2005, er installert oppsamlingssystem både frå kaikant og i området kor opphogginga skal gå føre seg.

Han seier vidare at heile 96 prosent av installasjonane som blir hogde opp, skal resirkulerast. Det meste skal vera av stål og andre metall som aluminium, rustfritt stål, syrefast stål, kopar, titan, m.m.

Farleg avfall i slike innretningar kan vera asbest i isolasjonen, kvikksølv i røyr, PCB i maling, og PAH i oljerestar. I tillegg kjem lågradioaktivt materiale.

Alt dette hevdar AF Decom-leiinga at dei har full kontroll over.