Dette var blant momenta Aftenbladets kunstkritikar Trond Borgen trekte fram då han tirsdag kveld deltok på eit debattmøte på Tou Scene om biletkunsten i Stavanger 2008.
– Det var lite internasjonal merksemd rundt kunstprosjekta i 2008 - noko det også var lite grunn til, sa Borgen, som i januar erklærte seg inhabil som kunstkritikar i Aftenbladet fordi avisa var ein av hovudsponsorane bak Stavanger 2008.
– Dermed representerer eg bare meg sjølv, den prinsipielle tenkinga og kritikarstanden, sa Borgen i går kveld.
Rammer
Sjølv om han meiner at ein del av det som er gjennomført i 2008 har vore både grensesprengande og flott, har dette skjedd utanfor biletkunstens rammer - eit perspektiv 2008-sjef Mary Miller ved innleiinga til debattmøtet erklærte seg lynande ueinig i.
– Det er både gammaldags og provinsielt å separera kunstformene. Det går i 2008 ikkje an å seia at dansekompaniet Inbal Pinto bare er scenekunst og ikkje har noko med visuell kunst å gjera, sa Miller.
Borgen har på si side både hatt positive og negative visuelle opplevingar gjennom kulturhovudstadsåret. Han har likt On the Edge og Tou Works 1. Campingkvinnene og Groth-utstillinga på Rogaland kunstmuseum falt også i smak.
Til gjengjeld var Borgen lite imponert over A World of Folk på Sandnes og prosjektet Nabolagshemmeligheter.
Ittepå
Både panelet Borgen, kunstnar Trond Hugo Haugen og programsjef i Stavanger 2008, Anne Britt Strømnes, var likevel mest opptekne av den manglande kulturelle infrastrukturen for biletkunst i Rogaland, og at dette må vera satsingsområdet i tida som kjem, som eit atelierhus.
– Då Graz var kulturhovudstad, bygde dei opp 100 Tou Scener. Stavanger 2008 hadde ein halv Tou Scene, og klarte ikkje å bygga huset skikkelig opp i løpet av året. Produksjonsmiljøa er det viktigaste framover, sa Jan Inge Reilstad, kurator for Nabolagshemmeligheter.
– Det er kunstnaranes eige ansvar å tenka og handla kunstnarisk, ikkje staten eller kommunen, sa Trond Hugo Haugen.
Kommentarer