Utsegna kom frå informasjonssjef Bente Aae i Stavanger 2008 like før ei busslast pressefolk blei frakta opp til Djuvsbotn i Svandalen for å få eit lite glimt av kva kultur kan vera i møte med ein eigenrådig og skiftande vestlandsvinter.
SNART PREMIERE: «Mot Himlaleite» har premiere førstkomande torsdag. Det vil bli fire førestillingar. Tre er utselde, men det er enno billettar att til søndag 9. mars. Det er plass til rundt 1000 tilskodarar kvar kveld.
- Eg trur ikkje eit auge er tørt når torsdagen kjem. Dette arrangementet er eit av hjartebarna våre, påpeikar Bente Aae.
Arrangementet er også eit av dei største som blir arrangert i løpet av kulturbyåret. Pengebudsjettet er på 9,5 millionar kroner. I tillegg kjem verdien av dugnadsinnsatsen frå nesten kvar familie i Sauda.
Totalt er 900 frivillige med for å få i hamn dette gigantiske og ville vinterstuntet.
AVLYSER IKKJE: Og showet blir ikkje avlyst uansett vêr.
- Kjem publikum, dansar me, lovar koreograf Leif Hernes i Dansdesign.
Vêret er såleis ein del av gamet og lyssettinga blir faktisk ekstra stilig i tåke, og vêrtrøbbel blir rett og slett berre ein del av førestillinga, blir det sagt. Men arrangørane er storbrukarar av yr.no, og har for lengst funne ut at torsdag 6. mars er avmerka med opphaldsvêr.
Dei 13 dansarane i Dansdesign smiler uansett det dei vinn mens snø og hagl piskar kinna deira, mens dei buktar og vrir seg gjennom skumringa. På bakkekammen ventar jibbarane på å få setja utfor. Oppvisinga blir avslutta med eit kjelkestunt av balansekunstnaren Eskil Rønningsbakken. Han renn nedover ståande på hovudet med sprikande bein.
AMFI I SNØ: I mens går to menn og spar fram amfiet i snøen. Amfiet blei laga for nokre veker sidan, men snør det, må det jamleg gravast fram att.
Smakebiten blei vist før det blei mørkt, difor fekk me ikkje sjå lyskunsten som er ein viktig del av oppsetjinga. Ved å bruka Norges to kraftigaste projektorar vil snøen bli brukt som eit gigantisk lerret. Nykomponert musikk og korsong vil også inngå.
Lokale kulturaktørar vil kransa bakken som publikum må forsera opp til Djuvsbotn, slik at opplevinga startar med det same ein kjem til foten av skitrekket.
Nå lurer alle på om dronninga eller kronprinsparet kjem. Førebels har Slottet ikkje svara på invitasjonen.
Les om «Mot himlaleite» på vår 2008-wiki! (og finn kart til Djuvsbotn)
Kommentarer