- Som skodespelar blir det interessant å jobba med ein karakter som lever i spenningsfeltet mellom å vera menneske og guddommelig, seier Duc Mai-The. I går blei Oslo-skodespelaren presentert som den nye Jesus, når Pasjon 08 set opp sitt mysteriespel «Over alt» i Domkyrkja i Stavanger 5. mars, med nytt manus og ny musikk.
- Duc er den perfekte Jesus, sa manusforfattar og regissør Svein Harry Schöttker Hauge då han møtte skodespelarane til første leseprøve i går.
Preg
Mysteriespelet inne i katedralen er bare ein del av det store pasjonsprosjektet, som kunstnarisk leiar Anna S. Songe-Møller garanterer at vil setja sitt preg på byen. 2008-versjonen er tredje gong Stavanger blir sendt tilbake til middelalderen ved påsketider.
Inne i sjølve Domkyrkja skal rundt 200 aktørar vera i sving i mysteriespelet «Over alt». Her skal profesjonelle og amatørar samarbeida fram ei forestilling som tar opp dei heilt store spørsmåla.
- Me skal ta opp ondskapens problem. Ondskapen blir materialisert i form av ein litt androgyn skapning, omgjeven av småjævlar, mens Gud tar form av ei lita jente, sa Schöttker Hauge då han presenterte prosjektet i går.
Jesus
Men den ultimate hovudpersonen i eitkvart påskespel, er sjølvsagt Jesus.
- Korleis er det å spela ein karakter som så mange har eit nært forhold til?
- Eg får mykje gratis. Det blir lettare å overraska, sidan mange har eit så tydelig bilete av han. Men samtidig må eg har respekt for folk sin religiøsitet og sterke forhold til Jesus, svarer Mai-The.
Han har sett fleire gestaltingar av Jesus på film. Sist i Willem Defoes tolking i «Jesu siste freisting» av Martin Scorsese. - Det var ein flott film som fekk fram dilemmaet mellom å vera både menneskelig og guddom. Jesus møtte ikkje bare motstand frå romarar og farisearar, men også frå folk flest, som ikkje kunne vita at dei hadde Messias framfor seg. Dei var vel så opptekne av korleis dei skulle få mat i magen og tak over hovudet som av himmelriket Jesus talte om.
- Kva forhold har du sjølv til Jesus?
- Eg har eit godt forhold til Jesus, om enn ikkje personlig og nært. Jesus snakkar ikkje til meg i det daglige. Men eg ser fram til å bli kjent med han.
Les også: Wiki om Pasjon 08
Kommentarer