Tirsdag gjekk forfattar Tore Renberg ut og kritiserte Kapittel-festivalen for å vera ei ullen blanding mellom ei ytringsfridomsgreie og ein litteraturfestival. Renberg vil ha ein tydelig litteraturfestival i Stavanger. Han fekk ikkje støtte av festivalsjef Eirik Bø, og får det heller ikkje av kultursjefen i Stavanger.
– I kommunens plan for ytringsfridom og litteratur, er visjonen at Stavanger skal vera eit europeisk knutepunkt for ytringsfridom, seier Aavitsland, som altså meiner at det naturlige vil vera å halda fast på, og spissa, det internasjonale ytringsfridomsperspektivet til Kapittel.
– Stavanger var Norges første friby for forfølgde forfattarar. Sekretariatet for verdas fribyar ligg på Sølvberget, seier Aavitsland.
Ho meiner årets Kapittel-festival gjennom temaet murar klarte å gi stemme til ein tematikk som gjennomsyrer byens litterære profil.
Knutepunkt
Ingen av Stavangers festivalar har nasjonal knutepunktstatus - som inneber at ein er gitt ein spesiell status av Kulturdepartementet og har fast plass på statsbudsjettet.
– Du seier Stavanger er eit europeisk knutepunkt for ytringsfridom. Burde Kapittel også ha nasjonal knutepunktstatus?
– Det er kanskje på tide at departementet kastar blikket i vår retning.
– Kjem du til å gjera noko for at Giske kastar blikket hit?
-–Det er ikkje min jobb å gjera det. Men eg kan vera ein av dei som kan vera med på å opna ei dør. Avgjerda ligg fullt og heilt i Kulturdepartementet.
– Burde ikkje Stavanger hatt ein rein litteraturfestival?
– Me treng dei gode samtalane og forfattarmøter med låg terskel. Litteraturveka på Sting har i så måte vore viktig, men i tillegg er det stadig møter med forfattarar på kafear og bibliotek rundt om i byen.
Bø
– På neste spørsmål får du bare lov å svara med eitt ord: Er du mest enig med Bø eller Renberg?
Det blir heilt stille i telefonen. Kultursjefen tenkjer så voldsomt at det er som om ho er blitt borte. Så kjem eittordssvaret (som er sterkt forkorta av journalisten):
– Eg syns årets Kapittel har presentert det beste programmet så langt, med eit tydelig og sjølvstendig tema og program.
– Det betyr «Bø»?
– I denne samanhengen synes eg Bø. Festivalen har hatt ein sterkare politisk snert i år, og det er bra. Kapittel 08 står som ein solid påle i ytringsfridomens navn.
Kommentarer