Den lattervekkjande latterfrosken.

– Dette er rett og slett fantastisk. Eg kjem til Finnøy til våren. Dette må eg sjå med eigne augo, seier Dolmen, som er blant landets fremste ekspertar på reptilar. Han jobbar til dagleg som førsteamanuensis ved NTNU Vitenskapsmuseum i Trondheim.

Botanikar Svein Imsland kom over frosken han gjekk sundagstur ved Hauskjevatnet.

– Eg kom over ein frosk som ikkje høyrer til i norsk fauna. Den var lysegrøn og ulik dei norske froskane. Heldigvis hadde eg med meg fotoapparatet, og fekk tatt eit bilete av den, seier Imsland som straks tok kontakt med førsteamanuensis Dag Dolmen ved NTNU i Trondheim.

Djevelsk latter

– Dette er eit svært interessant og uvanleg funn. Då Imsland tok kontakt med meg hadde eg vanskeleg for å tru at det var sant. Frosken høyrer ikkje til i norsk fauna, og det er veldig spesielt at den har klart å etablera seg i vårt klima over lang tid, seier forskaren entusiastisk.

Frosken er truleg av typen Rana ridibunda, eller latterfrosk, som er det meir folkelege namnet. I gytetida, som er på vår og forsommar, lager den svært mykje lyd.

– Latterfrosken sin song kan høyrast ut som ein djevelsk latter. Derav namnet. Det er hannfrosken som syng for å lokka til seg hoa, forklarer Dag Dolmen, som ikkje trur at latterfrosken på Finnøy kan gjera skade på norsk fauna.

– Det reknar eg for svært lite sannsynleg, seier han.

Ulovleg

Froskane på Finnøy kom truleg frå Polen som rumpetroll for kring seks år sidan, frakta av ein gut som hadde vore på ferie med familien sin.

– Det er viktig å gjera folk merksame på at det er ulovleg å ta med seg levande dyr over landegrenser. Sjølv når det dreier seg om noko så tilsynelatande uskyldig som rumpetroll, seier Svein Imsland.

Polsk konsert

Imsland er ikkje den einaste som har observert latterfrosken på Finnøy. Bonde Trond Spanne bur like ved.

– Eg både ser og høyrer dei. Det er mange av dei her i området, og dei lagar mykje støy. Tidlegare i sommar hadde me polsk konsert her kvar kveld. Medan dei norske froskane kjem med eit og anna kvekk, held desse froskane ein sjau utan like, det er reine kvakkefonien, seier han. Spanne trur dei er i ferd med å spreie seg til fleire vatn på Finnøy.

Bekymring

Froskefunnet på Finnøy begeistrar reptilforskaren, men i Fylkesmannen si miljøvernavdeling vekker det same funnet bekymring.

– Det er for tidleg å seia noko konkret om kva me kjem til å foreta oss i forhold til frosken på Finnøy, men funnet uroar oss, seier viltforvaltar Anders Brå i Fylkesmannen i Rogaland si miljøvernavdeling.

– Me har tidlegare hatt dårlege erfaringar med nye artar. Iberiasniglen er eit døme på det. Harlekin-marihøna er eit anna. Me veit ikkje korleis nye artar påverkar økosystemet vårt. Dei kan også føra med seg sjukdommar, som til dømes salmonella.

– Er det eit alternativ å utrydda frosken på Finnøy?

– Det er eit alternativ, men det er altfor tidleg å seia noko om det no, seier Anders Brå.Kvakkofoniar er eit nytt fenomen på Finnøy