Det har lesarane til Aftenbladet heldigsvis gjort i alle år, og den første snøklokkemeldinga er alltid kjekk å bringa ut. Og alle som ein undrar tipsarane seg på om det er nettopp dei som har funne den første blomen.
- Uvanleg tidleg
Snøklokkene i hagen til Langhelle plar sjeldan gløtta fram før mot slutten av januar, dermed venta ho ikkje å sjå dei kvite blomehovuda alt nå.
- Kjenner du det kribla i fingrane no etter å gå i gong med hagestell?
- Både og. Samtundes som eg likar det milde vêret, vil eg også gjerne ha litt skikkelig vinter, seier Langhelle, som måtte avgi ein bråte med snøklokke-løk til vegvesenet i samband med utviding av Auglendsbakken. Men ho ber løktapet med fatning og kan fortelja at løkvekster andre stader i hagen også har byrja å pressa seg fram mot lyset.
- Det er ikkje uvanleg at dei prøver seg litt på denne tida, men blømande snøklokker har eg aldri sett så tidleg, seier Langhelle.
Nærkontakt med snøklokker
Etter den hyggelege blomesamtalen med Anne Margrethe Langhelle gjorde me eit raskt arkivsøk i snøklokke-nyhenda til Aftenbladet sidan 1987, og det kan sjå ut som om Langhelle har rett, i allefall i høve til dei snøklokkene som har blitt omtala i Aftenbladet på desse åra.
Felles for dei fleste meldingane er at finnaren er fylt av vårlukke og entusiasme, noko som også smittar over på journalistane.
Oversikt
Her er nokre snøklokker frå tidlegare tider:
6. januar 1990 lurte ei jente på om ho hadde funne årets første snøklokker på Tjelta i Sola.
6. januar 1991 blei dei første snøklokkene observerte "på rot i kald vinterjord på Madla".
9. januar 1992 blei snøklokker observert i sørveggen til Oljedirektoratet.
10. januar 2001 blei nokre få snøklokker sett i Dalveien på Randaberg.
11. januar 1989 tipsar ei dame Aftenbladet om blømande snøklokker i Lysebuveien.
18. januar 2008 blir det observert snøklokker i Tananger.
19. januar 1995 kjem årets første snøklokkemelding til avisa frå Bru i Rennesøy kommune.
Snøklokkene var tregare i 2009, då kom første tips inn 24. januar frå ein mann på Stokka.
26. januar 2008 meldte avisa at "ved Sandnes kirke, under et tre, har seks tynne snøklokker kjempet seg opp av jorda."
29. januar 1999 presenterte Aftenbladet ein observasjon frå ein mann som hadde hatt nærkontakt med snøklokker på Nedre Tjensvoll.
I 2010 og 2011 var vintrane lange og kalde også i Stavanger. I 2010 finn me ingen snøklokkemeldingar i arkivet, men dei kikka nok opp då også. I 2011 er første snøklokkeobservasjon i Aftenbladet datert så seint som 2. mars, då blei blomane oppdaga på Åsen.
Kommentarer