Staden som vert kåra til den mest attraktive får 250.000 kroner som skal brukast på eit lokalt formål. Dette er fyrste gong "Statens pris for attraktiv stad" skal delast ut. Så langt er over 300 nominasjonar send til Distriktssenteret i konkurransen som er utlyst av kommunal- og regionalminister Liv Signe Navarsete. Stadane varierer frå bykjernen i Oslo til ytst langs Finnmarkskysten.
Dei nominerte stadane er plotta inn på eit Noregskart på sida "Norges beste plass" på Facebook. Kartet viser to nominerte stader frå Rogaland. Østhusvik på Rennesøy er nominert med teksten rolig og flott område med masse flotte og initiativrike folk som står på når det trengs. Hundvåg sin nominasjonstekst seier vakker natur, utruleg samhald og masse glade folk. Fleire stader er nominert med tekstar som det gnistrar i grendene, fantastisk stad, rett og slett Noregs beste plass.
Har du ikkje nominert din favorittstad endå? Nominasjonar kan sendast inn til og med søndag.
- Me er overvelda over den positive responsen til "Statens pris for attraktiv stad", og dei kreative forslaga frå heile landet. Heile Noreg har engasjert seg og gjeve sterke, detaljerte skildringar om kvifor akkurat deira stad skal vinna i år, seier Torhild Lamo hos Distriktssenteret i ei pressemelding.
Den årlege kåringa skal framheva og heidra kommunar eller andre aktørar som har vist vilje og evne til å skapa ein levande og attraktiv stad å bu, arbeida, driva næring og vitja. Alle kan føreslå kandidatar, og blant dei vert det kåra éin vinnar. Tildelinga av prisen skjer i juni.
Østhusvik er nominert som Noregs mest attraktive stad for å vera eit roleg og flott område med initiativrike folk.
Kommentarer