Rogaland må venta til transportplanen blir lagt fram i månadsskiftet februar/mars.
– Eg kan korkje seia ja eller nei til nokon prosjekt nå. Kva prosjekt som kjem med, er avhengig av den totale rammen for landet, den fylkesvise rammen og av fylka sine prioriteringar, seier Kleppa til Aftenbladet.
Meir pengar
Men statsråden og rogalendingen gav klare signal om at staten kjem med meir pengar til samferdsel i transportplanen:
– Regjeringa legg opp til ei større satsing på samferdsel enn det etatane vart bedne om å leggja fram. Det er ei klår målsetjing at ein ikkje bare skal vedlikehalda meir, men at det også skal vera rom for ein del større nye prosjekt. Eit stort løft, fleire titals milliardar, som statsministeren tidlegare har uttrykt, sa Kleppa.
Mykje å ta att
Kleppa åtvara likevel mot for høge forventningar: Etatane sitt framlegg til Nasjonal Transportplan som vart lagt fram for eit år sidan tok utgangspunkt i at den økonomiske ramma ikkje blei utvida. Sidan mange tiårs etterslep på vedlikehald er svært stort, prioriterte vegvesenet satsing på det, samt på trafikksikring, minna ho om.
Konsekvensen av dette blei eit forslått kutt i investeringar på bortimot 60 prosent.
– For å retta opp dette, pluss kompensasjon for pris- og lønsvekst, trengst det rundt 50 milliardar kroner. Så sjøl om regjeringa plussar på NTP med 50 milliardar, blir det ikkje investeringsvekst, påpeikar samferdselssjef Gunnar Eiterjord.
Meir enn Rogfast
Og som statsråden minna om: Rogfast er eitt av mange gode prosjekt som Rogaland ønskjer seg: På lista står også Eiganestunnelen, Ryfast, vidare utvikling av Jærbanen, bybane, bussatsing, E-134 over Haukeli, Dalanepakken med utbetring av mellom anna E-39 og så vidare. Bare den såkalla Jærenpakke 2 (som vil romma bybanen, Gandsfjord bru m.m.) vil koma på bortimot 20 milliardar kroner.
Bompenger uansett
– Behovet er uendeleg stort. Same kor store rammene blir, blir det tøffe prioriteringar og det blir naudsynt med lokal medfinansiering, understreka Kleppa.
Gode ord
Magnhild Meltveit Kleppa hadde rett nok gode ord å seia om Rogfast: –.Rogfast er eit spanande prosjekt. Det erstattar ei ferjestrekning som har hatt ein formidabel trafikkauke, mykje gods og særs mange passasjerar. Strekninga er ein sentral del av stamvegen langs kysten. Tunnel framfor ferje vil gje ein heilt annan fleksibilitet for dei reisande. Reisetida vert meir trygg, planlegginga enklare og kostnadane for næringslivet blir utvilsamt lågare, sa Kleppa som også klart ser kva viktig rolle Rogfast vil ha for å binda Rogaland og Vestlandet tettare saman.
Kritisk
Så gjekk ho over til å stilla nokre kritiske spørsmål:
– Vil prosjektet får ringverknader for dei indre områda i fylket og i dei indre områda i nabofylket? Skal det i framtida bu endå fleire folk langs kyststripa eller blir det ein ny vår også for dalstroka innanfor? Kva vil Rogfast tyda for den indre leia langs riksveg 13? Og for Ryfast? spurde Kleppa og let svara hengja i lufta.
Krisepakke
Kleppa minna om at samferdsel og kommuneøkonomi blir «sentrale element» i krisepakken som kjem den 26. januar. Kva konkret Rogaland har i vente, ville ho ikkje røpa ut over at det er snakk om mindre vedlikehaldsprosjekt.
Kommentarer