Kotelett frå Jæren er årets råvare

Stavanger Forum var torsdag kveld spekka av 500 sultne gjester, klare for Årets Måltid, der menyen er sett saman av dei beste råvarene i landet. Kvart fylke hadde nominert råvarer frå sjø og land, i tillegg til eit produkt, til den gjeve prisutdelinga i forkant av middagen.

Og det var altså Prima Jæren frå Rogaland som fekk prisen for årets råvare land for sin Carré kotelett av svin. Dei stakk av med 50.000 kroner og ein marknadspakke frå DnB Nor.

Det var fiskeri- og kystminister Lisbeth Berg-Hansen (Ap) som delte ut den gjeve prisen.

Tilstades var òg kokkeguru Ingrid Espelid Hovig, fylkesordførar Tom Tvedt og stavangerordførar Leif Johan Sevland.

Lovar nye produkt

Det var tredje år på rad Det Norske Måltid vart arrangert, og det er Næringsforeningen i Stavanger-regionen som er initiativtakar til konkurransen.

Dei tre representantane frå Prima Jæren AS var svært glade etter utdelinga, og dei lovar no nye saftige produkt frå Jæren.

- Dette freistar til vidareutvikling. Og me har mykje spanande på gang, seier prosjektansvarleg Anbjørn Øglend.

Dei tre fortel at det ligg mykje hardt arbeid bak produktet, som av juryen på 13 vart omtalt som eit svært saftig og godt produkt.

- Vanskeleg å utvikla premium mat i Noreg

- Det er brukt mykje tid og pengar på dette. Dette er det beste svineproduktet på Jæren, slår konserndirektør Ernst Eik fast.

- Det er nokså uvanleg at eit så kjent produkt vinn. Denne koteletta kan ein jo allereie få i mange forretningar, fortel marknadssjef Anders Hellegaard.

Øglend meiner det er vanskeleg å utvikla premium mat i Noreg fordi det er eit såpass lite land. Han peikar òg på at det dei siste åra har vore mykje fokus på pris når det gjeld matvarer.

- Men dette produktet er billig i forhold til kvaliteten. Me skal laga mat som skal vera verdt å kosta litt ekstra, seier Eik.