Auka satsing på globale utfordringar, helsetenester, velferd, kunnskapsbasert næringsliv og næringsrelevant forskning er hovudinnhaldet i forskningsmeldinga «Klima for forskning» som minister for forskning og høgare utdanning, Tora Aasland, la fram iettermiddag. Rektor ved Universitetet i Stavanger, Aslaug Mikkelsen er skuffa over at meldinga ikkje inneheld noko som helst av konkrete løfter for vekst i universitetssektoren.
Ho meiner det vil vera vanskeleg for UiS å innfri det ho kallar ambisiøse målsettingar utan å få tilført meir pengar. I følgje Mikkelsen blir UiS og andre nyare universitet i realiteten nedprioritert til fordel for eldre og veletablert universitet som Oslo og Bergen.
- Regjeringa har sagt at det ikkje berre skal handla om ressurstilgang, men om resultat. Det er ok, men me vil stilla likt på startstreken. Så langt er det ingenting som tyder på at det skal gjerast noko spesielt for dei nye universiteta, seier ho.
Saknar signal
Frå 2005 til 2007 var den samla realveksten for utgifter til universitetssektoren i Norge på 7.3 prosent.
- Me er nysgjerrige på kor mykje vekst me kan rekna med framover i sektoren generelt og spesielt for dei nye universiteta. Me hadde ynskja at det skulle komma eit politisk signal om ei endring i finansieringa som gjer situasjonen betre for UiS.
Mikkelsen meiner meldinga iseg sjølv passar UiS bra.
- Den treffer rimeleg greit i høve til olje- og gassforskning og ny satsing på fornybar energi. Kunnskapsbasert næringsliv er også viktig og treffer bra. Men den burde vore tydelegare på kultur og humaniora, seier ho.
- Dårlegast ut
Også president i Teknisk-naturvitenskapelig forening (Tekna), Marianne Harg, er skuffa over at forskningmeldinga ikkje inneheld ein plan for endring av finansieringsystemet.
- Forut for meldinga forventa me at regjeringa skulle komma med ein forpliktande opptrappings plan for norsk forskning gjennom å binda opp framtidige budsjett. Dette er ein veldig stor skuffelse, seier ho.
Harg påpeiker likeeins med Aslaug Mikkelsen at finansieringssystemet i dag berre tilgodeser dei store og etablerte universiteta, og at UiS er blant dei som kjem aller dårlegast ut.
- Me synes det er ille at det på denne måten blir to kategoriar universitet, dei gamle universiteta som har ei skikkeleg forskningsfinansiering, og nye universitet som mottar finansiering som liknar meir på situasjonen for høgskular enn til universitet, seier ho.
Petroleumssvikt
Harg meiner petroleumsforskning har fått ein altfor liten plass i meldinga.
- Me er urolige for at dette vil redusera forskningsaktiviteten i dei store oljeselskapa.. Det er et fråvær av strategi fra regjeringa si side for å sikra at naudsynt kompetanse blir gjort meir tilgjengeleg gjennom offentleg finansierte forskningsprosjekt, seier Harg.
Ho meiner statsråden ikkje har fått gjennomslag for politikken sin i regjeringa.
- Eg kjenner ikkje igjen SV sin politikk i dette. Eg hadde forventa at Tora Aasland skulle komma med ei melding som gir norsk forskning forutsigbare vilkår. Men denne forpliktar ingenting, det er berre nokre vage formuleringa, seier ho.
– Har fått
Statsråd Tora Aasland viser til at finansieringssystemet ikkje er eit tema i forsknigsmeldinga, og at det skal vera ein gjennomgang av ordningane i samband med statsbudsjettet. Ho meiner UiS har all grunn til å vera nøgde etter at dei tidlegare i år kom godt ut av det i samband med regjeringa si tiltakspakke.
- Eg håper ikkje dei har gløymt det. UiS fekk fleire nye stillingar, og meir enn andre, seier Aasland.
Kommentarer