Ba om 12 års forvaring

Ryfylke tingrett dømde 28. oktober i fjor Jensen til 12 års fengsel for drapet. Aktor la under hovudforhandlinga i tingretten ned påstand om inntil 15 års forvaring. Retten var den gongen ikkje samd med aktor i at drapet innfrir dei strenge kriteria som gjeld for at det skal kunna karakteriserast som eit drap under særs skjerpande omstende.

Påtalemakta anka straffutmålinga frå tingretten. Jensen kom med motanke med sikte på å få ei kortare fengselsstraff enn 12 år.

Ristesund ba i går lagmannsretten gi Einar Jensen 12 års forvaring. Den domfelte sin forsvarar, advokat Halvard Helle, bad om at klienten hans blei straffa på så mild måte som mogleg.

Sidan hovudforhandlinga i tingretten har saudamannen fått diagnosen «sosial personlegdomsforstyrring». Det blei poengtert i retten og kan komma til å inngå i dommaranes vurdering av straffespørsmålet.

Dagny Jensen (81) blei drepen natt til søndag 1. februar i fjor. Ho blei slått fleire gonger med stor kraft i hovudet og på overkroppen og blei påført store skader i både hovudet og brystkassa. Den eine lunga klappa saman. Sonen slo henne mellom anna med ein tung vedboks av kobbar.

Lagmannsrettens dom blir sannsynlegvis kjent i dag.