Årets festival er den tiande i rekka og føregår 16. og 17. september.
Borgen kan lova mykje av det velprøvde og populære, men festen har også mykje nytt å by på.
Festivalen startar som alltid med handverks/husflidsutstilling i Spinneriet fredag. Same kveld blir det kyrkjekonsert i Hjelmeland kyrkje med Gunstein Draugedalen og Olav Mostøl.
Nytt av året er at Marine Harvest satsar sterkare enn nokon gong på å synleggjera seg som ein viktig støttespelar bak frukt- og laksefesten.
Kino i trailer
Selskapet skal mellom anna ha ein trailer i Vågen, utstyrt som ein kinosal, der folk kan komma inn og sjå film frå eit oppdrettsanlegg.
I lufta vil Sea King-en demonstrera redning frå sjø, og eit mindre helikopter vil tilby turar over Hjelmeland for dei som ønskjer å sjå festivalen i fugleperspektiv.
Idol-konsert
Frå lufta vil ein mellom anna kunna sjå den heilt nye og permanente utescena ved kommunehuset. Her vil Maria Thoresen med band halda Idol-konsert laurdagen.
- Den nye scena er trekt lenger opp mot elva. Anlegget er laga av tre og stein, fortel festivalgeneralen.
Spinneriet vil i år husa heile 63 utstillarar. Terje Gordon Jensen frå Kristiansand er årets gjesteutstillar. Han lagar møblar og skulpturar og går alltid berrføtt, sommar som vinter, kan Terje Borgen opplysa.
Frukt- og laksefestivalen er etterkvart blitt så kjend at vêret ikkje lenger spelar så stor rolle for besøkstalet. Festen trekker fleire folk kvart år. I fjor var vel 3000 menneske innom.
Svoltne skal ingen gå frå festivalen dette året heller.
Laks og frukt i dungar får selskap av både vaffelkaker, thaimat, grillam, wokretter og endå mykje meir.
- Dei nye fiskeslaga til Marine Harvest, torsk og kveite, er naturlegvis også med, opplyser Borgen.
Hagevandring
Når ein ikkje et, kan ein tevla om den beste fruktdesserten, eller knipsa plommesteinar til det svir i fingrane.
Nytt av året er hagevandring i ein hage nær festivalområdet.
Fylkesmannen si landbruksavdeling står bak vandringa.
Dette er eit såkalla Streif-arrangement og skal vera ei markering av unionsoppløysinga, fortel festivalsjefen.
Terje Borgen trur det meste er på plass nå, men veit at det garantert vil bli stress heilt fram til fredag 16. september.
- Men det er slik det skal vera, det, konstaterer han nøgd.
Kommentarer