Jan Øvrebø oppmodar butikksjefar over heile fylket til å følga hans eksempel.
Kommunen han held til i blei hausten 2006 landets første Fairtrade-kommune, men det merka ikkje Øvrebø noko særleg av i sine butikkhyller.
Måtte kasta varer
Etter det første året som rettferdig kommune, måtte Øvrebø kasta både sjokolade, ris og ulike kaker merka Fairtrade.Han forklarer dette med at saudabuen ikkje var tilstrekkeleg informerte om vareutvalet, fordi marknadsføringa var for dårleg. I haust gjekk derimot Rimi-direktøren ut på fjernsyn og sa at alle butikkane i kjeden skulle ta inn Fairtrade-varer. Dermed losna det litt og Jan Øvrebø valde å gå offensivt ut og ta inn langt fleire varer enn basis-sortimentet på 18.
– Me har marknadsført varene via flygeblad og eigne annoser i lokalpressa, og denne gong ser me at det minkar i hyllene. Me må til og med bestilla nytt, seier Øvrebø og smiler.
Testbutikk
Rimi-butikken i Sauda har status som testbutikk i ICA-systemet, og Øvrebø får ofte telefonar frå kjøpmenn i andre kommunar som arbeider for Fairtrade-status. I slike situasjonar gjeld det for kjøpmennene å få vareutvalet på plass i tide, og då kan dei få viktig kunnskap hjå Øvrebø før dei set i gong. Ikkje alle varene er like lettselde, særleg ris og sjokolade er litt vanskelege å omsetja, til tross for at kvaliteten på varene er veldig god, i følge butikksjefen.
Roser er pop
Juice, te og kaffi er dei Fairtrade-varene det går mest av førebels, men Øvrebø reknar med at desse varene om kort tid vil få konkurranse av Fairtrade-rosene, som nå ligg på tredjeplass hjå han.
– Me får roser direkte frå Tanzania. Desse rosene er av førsteklasses kvalitet og held seg lenge. Dette har kundane funne ut, for eg får jamnleg telefonar frå folk som lurer på om me har fått inn nye roser, fortel Jan Øvrebø.
Alle Fairtrade-varer kostar mellom 10 og 15 prosent meir enn ordinære varer, men Øvrebø registrerer at stadig fleire er villige til å betala det vesle ekstra for rettferdige varer.
Nei til øl og vin
Forutan dei vanlege Faitrade-varene som kaffi, te, juice og ris, fører Øvrebø mellom anna pulverkaffi, speltkaker, risboller, pads av bomull, bomullspinnar, honning, rått røyrsukker og sukkerbitar.
– Eg fekk også spørsmål om eg ville selja rettferdig øl og vin, men det takka eg nei til. Det får Vinmonopolet ta seg av, seier Jan Øvrebø.
Kommentarer