Øksnevad er ikkje lenger ein jordbruksskule, men ein vidaregåande skule med dei tre linjene hest- og hovslagar, anleggsgartnar og landbruk. Hestelinja er den mest populære.
Elevane ved linja tykkjer dei er heldige som får halda på med det dei tykkjer er aller kjekkast midt i skuletida: Nemleg ri, køyra med hest og stella hest. Men dei saknar ein ting: Ridehall, slik at dei kan trena skjerma for ver og vind og motorisert trafikk.
Prioritet 1
Skissa rektor Rune Haaland legg på bordet viser eit 30 x 65 meters bygg for både køyring med vogn og sprangriding (hoppa over hinder), travbane, toalett, varmestove, stall og plass til for og utstyr.
– I dag er ein slik hall ein føresetnad for å gje eit fullgodt undervisningstilbod. Dei fleste andre skular med slike linjer har dette, fortel rektor.
Går politikarane i opplæringsutvalet den 8. april inn for tilrådinga til fylkesdirektør Magne Nesvik, tek rektor sikte på at ridehallen kan stå klar før året er omme.
Så viktig meiner skulen det vil vera å få bygd ridehall, at dei har prioritert dette framføre å rusta opp den gamle skulebygningen kor dei driv teoriundervisning til trass for at her er påvist muggsopp i veggene i den etasjen kor lærarane har arbeidsplassane sine. Skulen arbeider nå med å få fram ein plan for opprusting av denne bygningen, fortel rektor.
Kjekt og annleis
– Eg håpar me får hallen før eg skal slutta! Ridehall er det Terese Mattson frå Sandnes har sakna mest på skulen: Ho både rir og køyrer med vogn. - Eg begynte her fordi eg er veldig interessert i hest og ville læra meir. Dessutan ville eg ha to kjekke år i staden for bare vanleg allmenn, fortel ho.
På hestelinja lærer du det du treng for å arbeida med hest: Stell, fôring, mekking, riding, kjøring og hestesjukdomar. Skulen har både norske kaldblodsrasar som dølahest, fjording og travar og varmblods ridehestar. I alt har dei plass til 16 hestar.
Etter dei to åra kan du også gå ut i lære for eksempel på ein rideskule eller hos ein travtrenar og få fagbrev med yrkestittel hestefaglærd. Eller du kan gå i lære og bli hovslagar (sko hestar).
Vil bli politi
Eilin Haave for eksempel skal i lære i Stall Friheten på Osli ved Bråstein. Therese Mattson sin plan er å ta eit tredje år med påbygg allmenn slik at ho får studiekompetanse. Så vil ho søkja politihøgskulen.
– Her er eit aktivt hestemiljø på Jæren, - tenk bare på travmiljøet på Forus og dei mange rideklubbane, så det har ikkje vore vanskeleg i det heile teke å få læreplassar, seier rektor Haaland.
Snart kan du også få høgskuleutdanning innan hestefaget her: Høgskulen for landbruk og bygdenæring skal nytta anlegga på Øksnevad i undervisningsopplegget sitt.
Alle dei 24 elevane ved hestelinja er jenter: – Du må gjerne skriva at gutar er sterkt ønska! utbryt rektor Haaland. – Ikkje bare av omsyn til jentene, ler han, men av omsyn til at hestane skal vera godt skodde: Her er stor mangel på hovslagarar, og få av jentene som går her vel det yrket.
Kommentarer