Rogalandskvinner har teke etter og laga kvinnebunad etter mønster av gamle plagg. Resultatet skal no visast for første gong. Det skjer på Fotland Mølle i Time.
Kor mange timar dei har brukt, veit ingen. Men bunadnemnda til Rogaland Ungdomslag har lese og leita, fundert, lært, og sydd.
No har dei kome så langt at dei også har lært kunsten vidare til andre. Slik er det i dag rundt 20 kvinner i Rogaland som kan kle seg i den rekonstruerte bunaden til fest.
Rekonstruert
– Arbeidet har me gjort i nært samarbeid med Bunad- og Folkedraktrådet, etter prinsippa dei brukar når dei skal rekonstruera gamle drakter, fortel Daghild Håvardsholm og Ragnhild Ødegaard.
Dei veit ikkje kvifor dei vart bitne av ideen om å få rekonstruert ei kvinnedrakt. Men det vart dei. Og no handlar det mest om å få gitt det dei har funne vidare til andre.
Bunadnemnd
Det starta med at Rogaland Ungdomslag fekk eiga bunadnemnd i 1980. Dei reviderte først mannsbunaden. Så ønskte Eli Olsen å laga seg stakk etter ein modell på museet. Etter nøye gransking vov ho sitt eige stakkatøy, ja til ti stakkar. Slik fekk fleire sydd stripete stakk lik museumsstakken som eigentleg var frå Finnøy.
Etter kvart begynte ho å lesa gamle skifteprotokollar. Der står kledeplagg gjerne skildra, av og til også fargar og stoff. 4096 plagg frå 205 skifte er registrerte.
Frå dør til dør
I store delar av Ryfylke vart det i samarbeid med Bunad- og Folkedraktrådet, husflidslag og bygdekvinnelag arrangert møte og dør- til dør-vandring for å spørja etter gamle plagg. Det vart funne mange, men dei fleste var for nye. Til slutt vart det difor stort sett plagg på museet som vart brukte som utgangspunkt for bunaden, dei fleste kom frå Finnøy. Heile drakta er sydd for hand, og det går ikkje an å bestilla den. Den som vil ha, må gå på kurs.
Framtid
– Kva tenkjer de no?
– Ja, sei det. Me skulle ønskja at nokon kunne tenkja seg å gå på kurs for å læra å sy drakta til andre, eller for å halda kurs sjølv etter kvart, seier Ragnhild Ødegaard. Det er ikkje lenger noko som heiter at bunader vert godkjende. Bunad- og folkedraktrådet gir ei fråsegn til rekonstruerte drakter. Enno manglar denne drakta den siste runden inn dit.
Kommentarer