–- Dette er ein dag for realisering av draumar. Dei 52 utvandrarane som la frå kai i Stavanger i 1825, hadde ein draum om eit betre liv i Amerika. I dag vert draumen om å byggja skipet dei reiste med, realisert, sa konserndirektør Thor Christian Haugaland i SpareBank1 SR-bank under overrekkinga.
Sponsorar, medeigarar, styremedlemmer og andre inviterte gjester var onsdag samla for å delta på utvandrarfest.
– Dette er eit prosjekt av nasjonale dimensjonar. Ferda til «Restauration» i 1825 var starten på den organiserte utvandringa til Amerika. Tenkje seg til at dei var 52 personar som drog den lange vegen i denne skuta. Det må ha vore litt av ein tur, seier Haugland engasjert.
Ein stor dag
I 2007 starta bygginga av replikaen av Norge sitt første utvandrarskip. Skipet vil stå ferdig i 2009, 184 år etter at 52 rogalendingar la ut på ferda frå Stavanger til New York. Det er Jørn Magne Flesjå frå Ryfylke Trebåtbyggjeri som bygger båten. Med denne pengegåva er finansieringa sikra.
– Dette er ein stor dag. Ikkje tvil om det, seier den sindige båtbyggjaren frå Finnøy.
Han er utdanna ved båtbyggjarskulen i Jondal. Ideen om replikaen kom frå båtbyggjar og pensjonert lærar på båtbyggjarskulen, Maurice Eric Clement.
– Var det ikkje risikofylt å starta bygginga før finansane var i orden?
– Eigentleg ikkje. Me opplevde stor interesse frå fleire aktørar og har heile tida vore viss på at det skulle gå i orden, seier Clement.
Tiggarferd til USA
Stiftelsen Emigrantskipet Restauration vart starta i juni 2006. Det vart skrive kontrakt med Jørn Magne Flesjå og trebåtbyggjeriet på fem millionar kroner. Til no har det kome inn kring 1,3 millionar frå sponsorar i Nord-Rogaland.
Tidlegare i år var Nordbø, Aleksander Hauge og Per Inge Bøe frå Utvandrarsenteret i Stavanger på tiggarferd til USA. Planane vart presentert for norskamerikanarane, som opna både hjartedør og lommebøker for «Restauration».
– Dette har me stor sans for, seier karmøyamerikanaren Tor Tollesen.
Han flytta til USA som 19-åring, er busett i Seattle og var på festen som representant for The Karmøy Club beståande av 300 utflytta Karmøybuar.
Fjordaferd
Planen er å nytta «Restauration» i turistføremål, blant anna til fjordaturar. Målet er å starta med dette i 2010.
hjordis.mikalsen@ aftenbladet.no
Kommentarer