Barn og jordvern i klemme i Klepp

- Det er noko av det verste me kan koma borti når kommunen vert ståande midt mellom to statlege organ som kranglar og ikkje vert enige, seier Lea og oppsummerer slik: - Vegvesenet forlanger at vegnormalen vert fylgd. Elles er det motsegn. Landbruksavdelinga hos fylkesmannen har fått fylkeslandbruksnemnda med på at vegvesenet sine krav tek for mykje jord, og varslar motsegn.

No skal saka opp i hovudutval for lokal og utvikling 20. januar og i kommunestyret 9. februar.

- Uansett kva vedtak me gjer, kjem det motsegn frå staten. Det betyr at det går ut over barna sin sikkerhet. Me har ønskt oss denne sikringa av skulevegen i mange år. No kan den bli stoppa av statleg krangel. At me skal li i kompetansestrid mellom to etatar, reagerer eg enormt sterkt på.

Lea undrast kva konsekvensar dette kan få: - Betyr det at me skal stoppa all planlegging fordi gang- og sykkelveg tek jord? Skal me setja barns liv opp mot jordvern? Det vert ein vanvittig situasjon. Og dette kjem altså rett i fanget på oss no.

Ordføraren er samd i rådmannen si tilråding om å vedta reguleringsplanen for denne gang- og sykkelvegen.

- Barns liv må gå føre jordvern. Så får heller dei to statlege etatane snakka seg imellom og bli samde om korleis dei skal jenka dette til. Me kan ikkje ha det slik. Eg forventar verkeleg at fylkesmannen ryddar opp. Det er berre han som kan løysa opp i dette.