Elfin Lea i Klepp la i nyttårshelsinga si særleg vekt på den rikdommen av tilbod både Stavanger 2008 og det jærske kultursamarbeidet Spor har gitt.
– Dette har vore ei uforgløymeleg kultursatsing i Klepp og elles på Jæren, sa han.
Kollega Mjåtveit i Hå er også nøgd med alle kulturarrangementa på fyra som 2008-prosjektet On the Edge førde med seg til kommunen.
Historisk
Men Lea var sikker på at bygging av den interkommunale Frøyland og Orstad kyrkje vil verta hugsa aller best. Han gratulerte med ei kyrkje som ruver i det ytre og «som sterke krefter også vil få til å ruva i innhald». Også Time-ordførar Arnfinn Vigrestad nemnde kyrkja: Eit godt døme på kor viktig der er med entusiastar og folk som har vilje og tru på noko, sa han.
Vidaregåande
Han brukte eit heilt kapittel i talen på planen om ny vidaregåande skule på Bryne og fylkeskommunen sitt avtalebrot.
– Saka har lært meg mykje. Ikkje minst stiller eg spørsmål om fylkeskommunen er liv laga, sa han.
Hærverk
Elfin Lea er misnøgd med det han kallar ungdommen sin øydeleggingstrong.
– Noko eg aldri sluttar å forundra meg over og som eg verkt mektig irritert over.
Han viste til knuste glas i uversskur og busskur, og på jernbanestasjonane, ruteknusing på skulane, knuste lyskuplar både på Pollestad, Orstad og Kleppe og nedkøyrde vegskilt.
– Barn og unge må tidleg læra å ta ansvar for handlingane sine, sa han. Han oppmoda vaksne til å bry seg og gi beskjed.
Han gløymde likevel ikkje å gle seg over alle dei prektige ungdommane og at Klepp har færre lovbrot enn fylkes- og landsgjennomsnittet. Og han vil aller helst konsentrera seg om det postivive:
– La oss dyrka gladsakene i det komande året. Ikkje gløym at me bur i ein av dei mest attraktive kommunane, sa Lea.
Samarbeid
Vigrestad sende i si helsing eit hint til nabokommunen Hå.
– Eg er nok litt skuffa over at me ikkje har kome lenger i å utvikla det interkommunale samarbeidet på Jæren, sa han. Og nemnde både at samarbeidet på Klokkartunet i Hå har vorte vanskeleg og at Hå har meldt seg ut av Stavangerregionen Næringsutvikling.
– Å isolera seg er ingen farbar veg, sa han.
Hå-ordføraren ser annleis på det. Han meiner at eit av dei viktigaste måla i tida som kjem vert å ikkje verta innblanda i noko kommunesamanslåing.
– Det vert ei stor utfordring å stå imot presset som kjem der, å behalda kommunane på Jæren som di er.
Framtid
Å skapa gode omsorgstenester for kommunen sine innbyggjarar såg Vigrestad på som hovudutfordringa i året som kjem.
Mjåtveit meiner at innsatsen må konsentrerast:
– I starten av 2008 var det ikkje ei sky på himmelen. Det er heilt utruleg kor fort det kan snu. No vert det ekstra viktig å konsentrera seg om dei oppgåve som er lovpålagde, som barnehage, skule, omsorg.
Han viste til at kommunen er i rett spor med barnehagebygging for 50 millionar og 100 nye plassar, opprusting av skular og planar for Klokkartunet.
Karakterar
Og så er han nøgd med at Hå i året som gjekk gjorde det betre på karakterstatistikkane enn dei har gjort sidan 1979.
– Fire år på rad har det vore framgang. Det er skikkeleg positivt, sa Mjåtveit..
Kommentarer