- Ikkje få hjartestans på Ombo

Store deler av den mektige ryfylkeøya Ombo ligg framleis i djup mobilskugge. For Karin Ågesen som driv Joker Ombo er den manglande mobildekninga ei kjelde til konstant irritasjon. For helsepersonell er det ei kjelde til stress. Det har Karin Ågesen sett med eigne auger mange gonger når legehelikopteret har landa på kaien.T

På gode dagar kan det hende ho oppnår kontakt på kaikanten, men kor glirene oppstår varierer frå dag til dag, fortel ho. Nyleg var bygda utan både fasttelefon og mobiltelefon, då måtte ho midtfjords med båten for å få bestilt brød. Resten av bestillingane tok kollegaen seg av frå ein høgde over butikken.

• Har du tips om dårleg mobildekning? Send mail til oss her!

Null tipping

Mangelen på mobildekning gjorde også at ho måtte senda tippemaskina frå Norsk Tipping i retur, noko som var skikkeleg surt fordi Ågesen hadde venta i ti år på å få ei slik maskin.

- Maskina kunne vore påkopla ei fasttelefonlinje, men sidan sentralen er sprengt gjekk ikkje det. Dermed stod berre mobilløysinga att, og då måtte eg bare gi meg, fortel Karin Ågesen.

Dei nye bensinpumpene får ho og kundane heller ikkje full glede av sidan desse også treng mobildekning for å kunna brukast utanom butikken sine opningstider.

Somme båtavgongar frå Eidssund er bestillingsavgongar. Reisande som ikkje kjenner til mobiltilhøva blir fort ståande rådville på kaien når dei oppdagar at det ikkje går an å ringa til den ferja dei vil med, fortel Ågesen.

På grunn av mobilskuggen kan ho heller ikkje bruka berbar kortautomat, noko som gjer at ho må ha heile butikken open også når driv sommarkiosk.

Folk forlet båthamna

Drifta av båthamna lir også under mobilskuggen.

- Eg opplever ofte at båtgjester må reisa herfrå, fordi dei har ungdommar heime i byen som dei gjerne vil ha telefonkontakt med, og det kan dei ikkje her hjå meg, sukkar Ågesen, som har gitt opp å vona på betre tider, for etter det ho kjenner til har ikkje Telenor utbyggingsplanar for mobil i området.

Ågesen kjenner på stor irritasjon over statsselskapet og seier ho har gått til topps med problema. Ho er lei spørsmåla frå Telenor om ho har tjukke vegger og mykje skog rundt butikken. Ågesen meiner konsernet skulle fått i oppgåve å bygga skikkeleg ut i heile landet, og viser til at same selskap no er i gong med breibandutbygging på Ombo.

Ågesen ville kjøpt seg eiga antenne til rundt 20.000 kroner for å betre tilhøva rundt butikken, men det fekk ho ikkje lov til av Telenor, fordi dei frykta antenna kunne forstyrra deira utstyr i nærleiken.

Hjartesvikt i opningstida

Carina Ågesen har ein hjartestartar ved butikken.

- Men her bør ikkje folk få hjartetrøbbel utanom butikktida kor me kan få ringt etter hjelp via fasttelefonen, elles kan det fort gå for lang tid, seier ho, og fortel om fleire episodar kor mannskap på legehelikopteret har sprunge rundt på kaien i Eidssund og leita etter stader med mobildekning.

Håkon Eide i Ombo Vekst veit om fleire tilfelle kor liv nær har gått tapt på grunn av at ein har slite med å finna plasser med dekning.

- Eg veit at det var kritisk for ein mann som fall om i Eidssund for ei stund sidan. Til alt hell var det ein mann som sprang oppover bakkane og fekk kontakt med helsepersonell, men når det står om minutt kan det like gjerne enda gale, åtvarer han.

Han kjenner til fleire døme på at folk som har uvita har blitt frakta lange vegar fordi hjelparane må få mobilkontakt.

Knutepunkta bør sikrast

Eide seier at han veit at mobilnettet ikkje er eit naudsamband, men viser til at folk brukar det som det likevel, og at dette er noko styresmaktene bør ta innover seg i forhold til kva krav dei stiller til teleoperatørane.

- Eg ventar ikkje dekning på mobiltelefonen når eg er på jakt langt inne i Ryfylkeheiane, men eg ventar at det er mobildekning på knutepunkt som kaiar og ved butikkar, seier han.

Aftenbladet får også opplyst at ein alvorleg sjuk mann på Ombo måtte takka nei til video-overført pasientoppfølging fordi han korkje hadde breiband eller mobildekning god nok til å nytta seg av tilbodet.