- Ikkje vent all verda av mobilen

Ifølgje dekningsdirektør Bjørn Amundsen i Telenor har inntil 40.000 menneske i Oslo ikkje innandørs mobildekning. Politiførstebetjent Rolf Ravndal ved Strand og Forsand lensmannskontor sitt råd til folket er å ikkje venta for mykje av mobiltelefonen i Ryfylke, elles kan ein fort bli skuffa og frustrert.

Aftenbladet skreiv laurdag både på papir og nett om frustrasjonar og redsel knytta til dårleg mobildekning i Ryfylke. Avisa bad også rogalendingar om å melda inn dårleg mobildekning på Aftenbladet.no.

Me har fått rapportert om dårleg mobildekning i Stavanger: Både på Gausel, i Misjonsveien, Tors gate, og Valhallveien. Elles har det komme meldingar om dårleg dekning både frå Lund, Nærbø, Hellestø og Bogafjell.Tips frå Ryfylke gjeld: Fogn, Eidssund og Østhusvik. På E 39 mellom Håbafjell og Bogafjell blir det også rapportert om dårleg mobildekning. Også byasar må opp i andre etasje eller gå ut for å bruka mobilen.

Les også

- Ikkje få hjartestans på Ombo

Når butikkeigar Karin Ågesen skal oppnå kontakt med dei høgare makter gjennom mobiltelefonen kryp ho inn i ei posttralle ute på kaien i Eidssund på Ombo. Ho trur det er eit tidsspørsmål før den elendige mobildekninga fører til tap av liv.

Dårlegare telefonar

Mange av dei nyare mobiltelefonane er dårlegare til å ta i mot radiosignal enn dei eldre typane. Difor skaper ofte tjukke vegger problem, fortel Bjørn Amundsen, som legg til at det ville kosta tre milliardar kroner å gi alle i Norge full dekning.

Elles virkar dårleg mobildekning til å vera eit større problem for privatpersonar enn for politi og helsepersonell som begge har sitt eige radiosamband og er ustyrte med satelitt-telefon.

I Finnøy og Rennesøy slit politiet først og fremst med dårleg dekning til sjøs, men forholda har blitt mykje betre enn for nokre år sidan, fortel lensmann i Rennesøy Rolf Kant.

For politi og helsepersonell oppstår utfordringar knytt til dårleg mobildekning først og fremst når ein skal ha kontakt med privatpersonar på ein skadestad.

Lovlege mobilskuggar

Sjølv om mobilskuggane er plagsame er dei fullt lovlege. Telenor eller Netcom vil difor ikkje bli stilt ansvarlege dersom liv skulle gå tapt korkje i Ryfylke eller andre stader i område med dårleg mobildekning.

Telenor skuldar ikkje folk meir enn ei fasttelefonlinje. Når det gjeld konsesjonsvilkåra for mobiltelefoni er dei langt mindre og desse er for lengst oppfylte i Rogaland, opplyser Bjørn Amundsen, som i det Aftenbladet ringjer er på veg langs E 39 frå Kristiansand for å sjekka mobildekninga langs vegen til Stavanger og Haugesund.

Eit av krava som er stilt til Telenor er at alle tettstader med meir enn 200 innbyggarar skal ha 3G-nett. (Står for tredje generasjons mobiltelefoni, og omfattar mobile tenester for sending av data, bilde og tekst i mobilnettverk).

Eigne antenner ulovleg

Dei områda som ikkje har god mobildekning i grisgrendte strok er ikkje prioriterte av teleoperatørane fordi det per i dag ikkje vil lønna seg å byggja dei ut. Men dette kan endra seg dersom det kjem eit stort hytte- eller bustadfelt i området, fortel informasjonssjef Per Aril Meling i Telenor.

Somme kommunar som Suldal gir tilskot til teleselskapa for å byggja ut i grisgrendte strok. Telenor og kommunen har planar om slik fellesfinansiert utbygging i Vatlandsvåg og Bråtveit.

Og for dei som lurer; det er ikkje lovleg å setja opp antenner som forsterkar mobilsignala på huset ditt. Desse slår ofte ut mobilnettet til andre i området, åtvarar dekningssjef Amundsen.