-Ikkje legg ned skulen vår

Til det kan ordførar Bjørn Laugaland (Sp)berre replisera at verda har endra seg mykje sidan i vår.

– Oljeprisen har sunke frå 160 dollar til 40 dollar fatet. Det påverkar i høg grad kommunens kraftinntekter. Kommunen står føre drastiske kutt, og me må snu alle steinar. Då må skulen også ta sin del. Når det er sagt kan det henda at mitt parti går inn for å sjå på detaljane i kutta først etter at me har hatt eit temamøte om skulen 21. januar.

Rådmannens kuttliste er eit svar på formannskapet sitt ønske om å spara endå meir enn rådmannens opprinnelege forslag.

Dermed står både Jøsenfjorden skule, Randøy barnehage og skulen på Ombo i fare. Elles føreslår rådmannen mellom anna å redusera heimehjelp-tenesta kraftig.

Berre starten

Ordføraren vedgår at det blir eit stritt kommunestyre-møte med lite kjekke saker, men fryktar at dette berre er starten på ein lang periode med innsparing.

– Me har nok sett kraftinntekt-anslaget vårt for høgt, seier Laugaland. Han legg likevel til at alt ikkje er så ille som ein kan få inntrykk av. Dette grunngjev han med at hjelmelandsbuen har vore godt vande i dei tider kommunen var rik.

Jøsenfjorden skule har dette året 12 elevar frå 1. til 7. klasse. Frå hausten 2009 vil talet synka til ni elevar, om ikkje nye flyttar inn. Skulen er minst i Hjelmeland.

– Men ein må ikkje sjå seg blinde på desse tala, for ein må også ta med i reknestykket at det frå neste haust vil vera ni barn mellom 0 og tre år i bygda, påpeiker Sven Carlos Gjil.

Han er lærar ved Jøsenfjorden skule. Heile skulen og barnehagen feirar sin årlege nissefest då Aftenbladet stikk innom.

Spirer og gror

Tre av kvinnene som er med på utflukta klappar seg på magen i tur og orden og fortel at dei har småtroll i magen. Mange unge familiar har flytta til bygda dei siste åra.

– På to år har det flytta 27 personar til Jøsenfjorden og svært mange av desse er unge folk. Me veit om fleire som vurderer å flytta innover, men tek kommunen skulen frå oss, skiftar dei nok meining, påpeiker Sven Carlos Gjil.

Dei tilsette og elevane virkar samstemde på at dei ikkje ønsker å mista skulen.

– Me vil gjerne samarbeida med andre skular i dei periodane når kulla er svært små, men me ønsker ikkje nedlegging, for legg dei skulen ned får me han aldri tilbake, hevdar Bente Tednes Gjil.