Statens naturoppsyn i Agder og Rogaland (SNO) har i vinter følgd nøye med på jerven sine bevegelsar i Setesdal-Ryfylkeheiane. Direktoratet for naturforvaltning (DN) har enno ikkje teke stilling til søknaden om skadefelling.
Kartlegginga gir SNO grunn til å tru at jerven ikkje har yngla, opplyser regional rovviltansvarleg i Agder og Rogaland, Jon Erling Skåtan.
Men det er dokumentert jerv jamnleg i Lyse, Suldal-og Bykleheiane, opplyser SNO. Det er også regelmessig registrert meldingar om jervespor frå folk som har sett dette når dei har vore i heia, opplyser Skåtan.
I september i fjor blei det avdekka betydelege skadar på lam i Lyseheiane og tilstøytande område. Det blei sett i gong lisensjakt på jerven frå september til februar, utan at noko dyr blei felt. Rogaland Sau og Geit søkte difor om løyve til skadefelling. Direktoratet for Naturforvaltning (DN) har ennå ikkje avgjort om slikt løyve vil bli gitt. I utgangspunktet var DN ifølge SNO innstilt på at det skulle fellast jerv i området, om det blei funne ferske spor. Statens naturoppsyn sleit med vanskelege verforhold i veka før påske, men drog opp i heia att etter påske. Det blei då ifølge Skåtan ikkje funne spor etter jerv i Lyseheiane. I Bykle blei det funne ferske spor etter eitt dyr.
Treng nytt snøfall
Denne jerven blei spora vestover og inn i Suldal. Spora forsvann på barmark i Suldal, og var deretter ikkje mulige å følgja. Etter dette har det vore nattefrost, og då set ikkje jervepotane spor. Arbeidet med jerv i Setesdal-Ryfylkeheiane er difor sett på vent. Det vil bli tatt opp att om det igjen blir mogleg å registrera jervens rørsler, til dømes ved eit nytt snøfall i høgda.
Jerveregistreringene er gjort ved hjelp av snøskuter og helikopter. Når forhalda har tillete det, er også dyr baksporet for å registre kor dei har gått og for å finne avføring. Avføringa blir brukt til å bestemma individet sitt DNA. Svaret på DNA-analysane vil først vera klare ved årsskiftet.
Vandrar langt
SNO skriv i rapporten sin at jerven har svært stor vandringskapasitet og ofte går fleire mil i løpet av ei natt. Nokre dyr kan vandra svært langt. Dette viser blant anna DNA-analyser frå tidlegare år. Den 16. april 2008 blei det funne avføring frå eit individ nord i Suldal. Under tre veker seinare, den 4. mai, blei det funne avføring frå same dyret i Årdal i Sogn og Fjordane. Dette dyret blei også registrert i Setesdal–Ryfylkeheiene i 2007. Slike vandringar er ein naturleg del av jervens biologi og kan forklare kvifor det i perioder er vanskelig å registrera jerv i enkelte områder, skriv SNO.
Kommentarer