Kulturpris til hage- og skøyteguru

Gjennom ein mannsalder har Tore Sandvik vore ein aktiv og sentral person i det lokale kultur- og organisasjonslivet i Hjelmeland. Likevel må ein kunne seia at det er innan idrett og hagestell han har utmerka seg mest, skriv informasjonsmedarbeidar Else Marie Førre i Hjelmeland kommune i ei pressemelding.

Glødande interesse for is

Det var på den idrettslege arenaen at Hjelmeland først fekk gleda av det ukuelege pågangsmotet og entusiasmen til Tore. Gjennom Fister IL skapte han alt tidleg på 70 talet ei brennande interesse for skøytesporten. Aldri har ein, – verken før eller seinare, hatt så mange skøyteløparar i Hjelmeland som i desse to påfylgjande tiåra, ifølgje pressemeldinga.

Barmarkstreninga føregjekk ofte med utgangspunkt frå garden til Tore. Med Tore som sjølvskriven skøytetrenar. Her var det oppvarming med fotballkamp i frukthagen, - så energisk kunne oppvarminga vera at fruktblomen dryssa som snø i vårsola. Fister IL stod også som arrangør av fleire større skøyterenn i denne epoken. Med Hetlandsvatnet, eller Sigmundstadtjønna som arena vart det arrangert både krestmeisterskap og vestlandsmeisterskap. Tore la også til rette for at dei unge lovande skøyteløparane skulle få delta på skøytestemne elles i landet. I ei tid der verda ikkje var så tryggleikskrevjande fylde Tore varebilen med campingstolar og drog blant anna til Austlandet for at dei unge skulle få konkurrera.

Og Tore sin entusiasme bar frukter, - i Hjelmeland fant ein fleire av dei beste skøyteløparane på Vestlandet på denne tida.

Fuchsialag

Parallelt med skeiseinteressa har Tore også hatt hjarte for planter, hage og blomar. Sjølv om dette også har vore ein del av levevegen hans, har Tore langt til grunn eit engasjement som langt overgår pengar og innkome. Både Fuchsialaget i Ryfylke, men ikkje minst Hjelmeland hagelag har nytt godt av entusiasmen hans. Under Tore Sandvik si leiing har Hjelmeland hagelag makta å bli det hagelaget i Rogaland som har rekruttert flest ungar til Barnas hagelag. Hjelmeland hagelag vart også kåra til Årets hagelag i Rogaland, - først i 1984, deretter i 2008. I 2008 vart laget også kåra til Årets hagelag i Norge.