Lagspel på Ryfylke-vis

Tomatgolf, jurklutkasting, duell i tomateskebretting og brubygging. Dette er berre nokre av ingrediensane i spelet som utgjer eit stort Ryfylke-kart teikna av illustratøren Jens Flesjå frå Finnøy.

Lagbygging

Dette er eit terningspel der deltakarane får ulike utfordringar å bryne seg på etter kvart som ferda går gjennom Ryfylke. Samarbeid er viktig, spelet legg opp til teambuilding, forklarar Leif Arild Steen, men blir avbroten av dagleg leiar Tor Øyvind Skeiseid.

- Det heiter ikkje teambuilding, Leif Arild. I Ryfylke heiter det lagbygging, rettar han lattermildt.

Mobilt

Dei fire livsgnistarane Tor Øyvind Skeiseid, Leif Arild Steen, Kåre Vignes og Helene Vestbø har jobba lenge med spelet.

- Det har teke mykje tid, tankearbeid og planlegging. Men no har me kome fram til eit resultat som me er godt nøgde med, seier Skeiseid.

Ryfylkespelet er mobilt. Det tek 45 minuttar å rigga det til, og det kan spelast både ute og inne. To instruktørar frå Ryfylke Livsgnist fylgjer alltid med.

Det kan spelast av både bedrifter og privatpersonar, og ein treng ikkje vera Ryfylke-ekspert for å bli med, forklarar Helene Vestbø.

Tomatjakt

Deltakarane blir delt opp i fire lag, og ferda går ut i Ryfylke frå Randaberg, Horve, Røldal og Sandeid. Vidare langs Ryfylkevegen, mellom øyar, fjordar og fjell. For kvart kast med den enorme, spesiallaga terningen møter ein nye utfordringar i form av oppgåver, duellar og spørsmål. Er det vinmonopol i Strand kommune? Kan du ta rutebåt frå Fister til Byre? Kor i Ryfylke kjem Berge Furre frå? Har delar av Rennesøy høyrt til Finnøy kommune tidlegare? Lagbyggingsppgåvene spenner frå å sortera basarårer frå høgaste til lågaste tal, eller å finna ut når ein er på Sand dersom ein tek ferja klokka tolv frå Mortavika.

Målet er å vinna fleire tomatar enn motstandarane. Det viktigaste er å visa praktisk innsikt og evne til å ta strategisk rette avgjersler i samarbeid med andre.

- Som eg sa: teambuilding, seier Leif Arild Steen og legg trykk på siste ordet medan han sender eit utfordrande, men spøkjefullt, blikk i retning Skeiseid.