Vibeke Meling (Sv) som var den einaste i formannskapet som gjekk mot å leggja ned Talgje skule, fekk med seg Ottar Sandanger (Ap) og Per Jakob Eike (Sp) i kommunestyret.
Dermed blir all skuledrift flytta over til Finnøy sentralskule og Hesby skule etter nyttår. På lengre sikt skal all skuledrift for Talgje og Finnøy føregå på Judaberg når sentralskulen er utbygd.
Vibeke Meling (Sv) sa det var uakseptabelt for SV og Ap å avvikla skuledrifta på Talgje. - Dette kom som eit sjokk for oss. I vårt valgprogram ville me ikkje endra skulemønsteret før Finnfast er åpna. Eit slikt hastevedtak er me mot, sa Meling som ville flyttinga skulle utsetjast til hausten.
Odd Bleie (Sp) sa at skule og skulenedleggjing er følsomme saker. Dette vedtaket som nå blei gjort, var tredd ned over hovudet på politikarane. Det hadde skjedd for fort. Ein må bruka meir tid ved seinare høve, meinte han.
Rådmann Magne Kongsvik opplyste at Finnøy kommune vil spara to millionar kroner ved å flytta Talgje-elevane til Finnøy. 1,2 millionar kroner i fyrste halvår og 800.000 kroner i andre halvår.
Ordførar Kjell Nes (Krf) meinte at denne innsparinga på den måten er smerteleg. - Når me i tillegg har foreslått maksimal utteljing i eigedomsskatt, måtte me eventuelt kutta fleire skular.
– Det hadde vore verre å kutta i nordre del av kommunen der det ikkje er vegutløysing på veg, sa Finnøy-ordføraren.
Kommentarer